ఓట్ల గల్లంతు, ఓటర్ల ధర్నా: నిజామాబాద్ లో ఉద్రిక్తత

నిజామాబాద్: ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ పోటీ చేస్తున్న నిజామాబాద్ అర్బన్ నియోజకవర్గంలో ఉద్రిక్త పరిస్థితి నెలకొంది. పోలింగ్ సందర్భంగా ఉద్రిక్త వాతావరణం నెలకొంది. నిజామాబాద్ లో పలువురు ఓట్లు గల్లంతయ్యాయి. దీంతో వారు ఆందోళనకు దిగారు. పోలీసులతో వాగ్వివాదానికి దిగారు. ఈ సందర్భంగా ప్రజలకు, పోలీసులకు మధ్య తోపులాట జరిగింది. బిజెపి కార్యకర్తలు ఎండివో కార్యాలయం వద్ద ధర్నాకు దిగారు. పోలీసులు ఆందోళనకారులపై లాఠీ చార్జీ చేశారు.

ఓ పోలింగ్ బూత్ వద్ద డ్వాక్రా మహిళలు ఓటర్లకు డబ్బులు పంచుతూ పట్టుబడ్డారు. డబ్బులు పంచుతున్న మహిళలు ఓ టీవీ చానెల్ కెమెరాకు చిక్కారు. ఫలితాన్ని తారుమారు చేయడానికి డి. శ్రీనివాస్ అక్రమాలకు పాల్పడ్డారని బిజెపి నాయకులు విమర్శిస్తున్నారు. పలువురి ఓట్లను గల్లంతు చేశారని, అక్రమ ఓటర్లను నమోదు చేయించారని వారు ఆరోపించారు. నిజామాబాద్ పార్లమెంటు సభ్యుడు మధుయాష్కీ పేరు మీద రెండు ఓట్లు ఉన్నాయని వారు చెబుతున్నారు.