వైయస్ జగన్ వ్యవహారంపై రంగంలోకి హైకమాండ్

హైదరాబాద్: తమ పార్టీ పార్లమెంటు సభ్యుడు వైయస్ జగన్ వ్యవహారాన్ని స్వయంగా పరిశీలించేందుకు కాంగ్రెసు అధిష్టానం రంగంలోకి దిగుతుందని అంటున్నారు. ఈ మేరకు ఒక ప్రముఖ తెలుగు దినపత్రికలో ఓ వార్తాకథనం ప్రచురితమైంది. ఆగస్టు 6వ తేదీ తర్వాత కాంగ్రెసు ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ సహా హైకమాండ్ ప్రతినిధులు హైదరాబాద్ వచ్చి పరిస్థితిని స్వయంగా పరిశీలిస్తారని తెలుస్తోంది. జగన్ సొంత పార్టీ పెడతారనే ప్రచారం జరుగుతున్న నేపథ్యంలో రాష్ట్రంపై పూర్తి పట్టు సాధించేందుకు హైకమాండ్ కసరత్తు చేయనున్నట్లు సమాచారం.

తమను మాటను ధిక్కరించి జగన్ వరంగల్ జిల్లాలో ఓదార్పు యాత్రకు బయలుదేరడం, శ్రీకాకుళం, తూర్పు గోదావరి జిల్లాల్లో పర్యటించిన నేపథ్యంలో హైకమాండ్ రంగంలోకి దిగనున్నట్లు చెబుతున్నారు. ఓదార్పు యాత్రల్లో వైయస్ జగన్ పార్టీ అధ్యక్షురాలు సోనియా గాంధీ పేరును కనీసంగా ప్రస్తావించకపోవడంలో ఆంతర్యాన్ని కూడా పరిశీలిస్తున్నట్లు సమాచారం. అలాగే, వైయస్ రాజశేఖర రెడ్డి మరణించిన క్షణం నుంచి జగన్ పావులు కదపడానికి చేసిన ప్రయత్నాలను కూడా పరిగణనలోకి తీసుకుంటున్నట్లు తెలుస్తోంది. జగన్ తనంత తానుగా వెళ్లిపోయే వరకు నిరీక్షించాలా, జగన్ పై చర్యలు తీసుకోవాలా అనే విషయాలపై కూడా హై కమాండ్ దృష్టి పెట్టినట్లు తెలుస్తోంది.