వైయస్ జగన్ వర్గంపై భగ్గుమన్న కాంగ్రెసు సీనియర్లు

హైదరాబాద్: తమ పార్టీ పార్లమెంటు సభ్యుడు వైయస్ జగన్ వర్గంపై కాంగ్రెసు పార్టీ సీనియర్లు భగ్గుమన్నారు. జగన్ వర్గం చేసిన వ్యాఖ్యలపై వారు బుధవారం తీవ్రంగా ప్రతిస్పందించారు. కాంగ్రెసు పార్టీకి వైయస్ జగన్ దిక్కు ఏ మాత్రం కాడని పార్లమెంటు సభ్యుడు వి హనుమంతరావు అన్నారు. కాంగ్రెసు పార్టీకి పెద్ద దిక్కు సోనియా, రాహుల్ గాంధీలని ఆయన అన్నారు. ముఖ్యమంత్రులను విమర్శించే అలవాటు వైయస్ రాజశేఖర రెడ్డికి ఉండేదని, అదే అలవాటు జగన్ కు కూడా వచ్చిందని ఆయన అన్నారు. తెలంగాణ గురించి మాట్లాడే హక్కు అంబటి రాంబాబుకు లేదని కాంగ్రెసు సీనియర్ శాసనసభ్యుడు పి. శంకరరావు అన్నారు. జగన్ పర్యటించినా తెలంగాణ ఎన్నికలపై ప్రభావం ఉండేది కాదని ఆయన విడిగా హైదరాబాదులో మీడియా ప్రతినిధులతో అన్నారు. తెలంగాణ రాష్ట్రం త్వరలో ఏర్పడుతుందని ఆయన అన్నారు.

జగన్ వర్గంపై కాంగ్రెసు సీనియర్ నాయకుడు పాల్వాయి గోవర్దన్ రెడ్డి కూడా తీవ్రంగా మండిపడ్డారు. వైయస్ రాజశేఖర రెడ్డి చుట్టు తిరిగి వందల కోట్ల రూపాయలు సంపాదించుకున్నవారే అటువంటి వ్యాఖ్యలు చేస్తున్నారని ఆయన అన్నారు. వైయస్ ను ముఖ్యమంత్రి రోశయ్యతో, ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ తో పోల్చడం సరి కాదని ఆయన అన్నారు. వైయస్ చుట్టు చేరి వందల కోట్లు సంపాదించినవారికి కాంగ్రెసు పార్టీ క్షేమం అవసరం లేకుండా పోయిందని, కాంగ్రెసు పార్టీ వారికి ఇష్టం లేదని ఆయన అన్నారు.