ఉప ఎన్నికల్లో మెజారిటీ సీట్లు కాంగ్రెసుకే: దానం నాగేందర్

హైదరాబాద్‌: తెలంగాణ ఉప ఎన్నికల్లో మెజార్టీ సీట్లను కాంగ్రెసు కైవసం చేసుకోవడం ఖాయమని రాష్ట్ర వైద్య ఆరోగ్య శాఖ మంత్రి దానం నాగేందర్‌ ఆశాభావం వ్యక్తం చేశారు. ప్రదేశ్ కాంగ్రెసు కమిటీ (పిసిసి) అధ్యక్షుడు డి.శ్రీనివాస్‌ పోటీ చేసిన నిజామాబాద్‌తోపాటు ఎల్లారెడ్డి, చెన్నూర్‌, సిరిసిల్ల, కోరుట్లలతో పాటు మరికొన్ని కాంగ్రెసు ఖాతాలో చేరడం ఖాయమని ధీమా వ్యక్తం చేశారు.

ఉప ఎన్నికల్లో దాదాపు మొత్తం స్థానాలు తెరాస కైవసం చేసుకుంటుందన్న పార్లమెంటు సభ్యుడు లగడపాటి రాజగోపాల్‌ వ్యాఖ్యలపై దానం స్పందిస్తూ ఆయన సర్వేల్లో అలా తేలిందేమోనని అన్నారు. తెలంగాణలోని 11 సీట్లను తెలంగాణ రాష్ట్ర సమితి (తెరాస) గెలుచుకుంటుందనేది రాజగోపాల్ వ్యక్తిగత అభిప్రాయమని ఆయన అన్నారు. లగడపాటి సర్వే పేరుతో వెల్లడించిన అభిప్రాయం సరి కాదని కాంగ్రెసు ఎమ్మెల్సీ పొంగులేటి సుధాకర రెడ్డి అన్నారు.