జగన్ కాకినాడ ఓదార్పు సభ: ఎమ్మెల్యేల మోహరింపు

కాకినాడ: తూర్పు గోదావరి జిల్లా కాకినాడలో కాంగ్రెసు కడప పార్లమెంటు సభ్యుడు వైయస్ జగన్ ఓదార్పు యాత్ర ముగుస్తున్న సందర్భంగా గురువారం ఆయన వర్గానికి చెందిన శాసనసభ్యులు, నాయకులు మోహరిస్తున్నారు. మంత్రి పిల్లి సుభాష్ చంద్రబోస్ అక్కడికి చేరుకున్నారు. తాము బలప్రదర్శన చేయడం లేదని, జగన్ ను పరామర్శించడానికి వచ్చామని పిల్లి సుభాష్ చంద్రబోస్ మీడియా ప్రతినిధులతో అన్నారు. శాసనసభ్యులు శ్రీకాంత్ రెడ్డి, ఆదినారాయణ రెడ్డి, శ్రీనివాసులు, అమర్నాథ్ రెడ్డి, రామచంద్రారెడ్డి, వెంకటేశ్వర రెడ్డి, సత్యవతి ఓదార్పు యాత్రకు చేరుకున్నారు.

కాంగ్రెసు నాయకులు శేషారెడ్డి, అంబటి రాంబాబు, భూమన కరుణాకర్ రెడ్డి, గొనే ప్రకాశరావు కూడా సంఘీభావం తెలపడానికి అక్కడికి వచ్చారు. మాజీ మంత్రి కొండా సురేఖ దంపతులు, ఎమ్మెల్సీ పుల్ల పద్మావతి కూడా జగన్ కు సంఘీభావం ప్రకటించారు. గురువారం సాయంత్రానికి మరింత మంది కాకినాడకు చేరుకుంటారని భావిస్తున్నారు.