విశ్వవిద్యాలయాల విసిలపై గవర్నర్ నరసింహన్ పాఠాలు

హైదరాబాద్: విశ్వవిద్యాలయాల వైస్ చాన్సలర్ల తీరుపై రాష్ట్ర గవర్నర్ నరసింహన్ మరోసారి ఆగ్రహం వ్యక్తం చేశారు. విద్య విషయంలో అలసత్వం తగదని ఆయన విసిలకు హితబోధ చేశారు. విసిలకు ఆయన గురువారం జరిగిన సమావేశంలో పాఠాలు చెప్పారు. ఎంసెట్ లో కొంత మంది విద్యార్థులకు సున్నా మార్కులు రావడంపై ఆయన ఆరా తీశారు. విద్యార్థులకు సున్నా మార్కులు వచ్చిన తర్వాత ప్రవేశ పరీక్షకు అర్థం ఏమిటని ఆయన అడిగారు. వచ్చే ఏడాది సున్నా మార్కుల తీరుపై సమీక్ష జరపాలని ఆయన ఆదేశించారు.

సున్నా మార్కులు వచ్చినవారికి ర్యాంకులు ఎలా కేటాయిస్తారని ఆయన అడిగారు. కళాశాలలు మూసివేస్తామని యాజమాన్యాలు ప్రకటించడంపై ఆయన తీవ్ర ఆగ్రహం వ్యక్తం చేశారు. విద్యార్థుల స్కాలర్ షిప్ లు, ఫీజులు విషయంలో అనుసరిస్తున్న వైఖరిని కూడా ఆయన తప్పు పట్టారు.