ఇక వైయస్ జగన్ ఢిల్లీ మంత్రాంగం: పెద్దలతో భేటీ?

న్యూఢిల్లీ: తూర్పు గోదావరి జిల్లాలో ఓదార్పు యాత్రను ముగించుకున్న కాంగ్రెసు కడప పార్లమెంటు సభ్యుడు వైయస్ జగన్ ఢిల్లీ చేరుకున్నారు. ఆయన ఇక తన వ్యూహానికి ఢిల్లీలో పదును పెడుతారని అంటున్నారు. పార్లమెంటు సమావేశాలు జరుగుతున్న నేపథ్యంలో ఆయన ఢిల్లీకి చేరుకోవపడం ప్రాధాన్యం సంతరించుకుంది. పార్టీ సభ్యులందరూ సభకు రావాలని కాంగ్రెసు విప్ కూడా జారీ చేసింది. ఈ విప్ ను జగన్ గౌరవిస్తారా, లేదా అనే సందేహానికి ఆయన తెర దించారు.

తన ఢిల్లీ పర్యటనలో జగన్ పార్టీ వ్యవహారాలపై అధిష్టానానికి చెందిన నాయకులతో చర్చించే అవకాశాలున్నాయి. ప్రధానంగా ఆయన పార్టీ ఆంధ్రప్రదేశ్ వ్యవహారాల ఇంచార్జీ వీరప్ప మొయిలీతో సమావేశమవుతారని భావిస్తున్నారు. పార్టీ సీనియర్లపై, తన ఓదార్పు యాత్ర ఉద్దేశ్యంపై ఆయన మొయిలీకి వివరించే అవకాశాలున్నాయి. అలాగే, తనను బలపరుస్తున్న అంబటి రాంబాబుపై సస్పెన్షన్ వేటు వేసిన వ్యవహారంపై కూడా ఆయన మాట్లాడే అవకాశాలున్నట్లు భావిస్తున్నారు.