వైయస్ జగన్ ను కాంగ్రెసు నుంచి పంపించేందుకు కుట్ర: ఎమ్మెల్యేలు

హైదరాబాద్: ఎపిఐసిసి కుంభకోణంపై తీవ్ర ఆరోపణలు చేసిన తమ పార్టీ శాసనసభ్యులు డిఎల్ రవీంద్రా రెడ్డి, జెసి దివాకర్ రెడ్డిపై కాంగ్రెసు పార్లమెంటు సభ్యుడు వైయస్ జగన్ వర్గానికి చెందిన శాసనసభ్యులు శ్రీకాంత్ రెడ్డి, ఆదినారాయణ రెడ్డి తీవ్రంగా విరుచుకు పడ్డారు. పదవులు ఆశించి జగన్ పై, దివంగత నేత వైయస్ పై వారు విమర్శలు చేశారని ఎమ్మెల్యేలు బుధవారం మీడియా ప్రతినిధుల సమావేశంలో ఆరోపించారు. కష్టకాలంలో ఉన్నప్పుడు కాంగ్రెసు పార్టీని ఆదుకున్న మహా నేత వైయస్ రాజశేఖర రెడ్డి అని, అటువంటి నేతను కించపరిచేలా మాట్లాడడం సరి కాదని శ్రీకాంత్ రెడ్డి అన్నారు. పథకం ప్రకారం కుట్రదారులు వైయస్ పై విమర్శలు చేయడం బాధాకరమని ఆయన అన్నారు.

రాష్ట్రంలో వైయస్ రాజశేఖర రెడ్డిని అభిమానించే వాళ్లు కోట్లాది మంది ఉన్నారని, వారంతా సైకోలా అని ఆయన అన్నారు. వైయస్ అభిమానులను సైకో ఫ్యాన్స్ అని డిఎల్ రవీంద్రారెడ్డి శాడిస్టులా మాట్లాడారని ఆయన వ్యాఖ్యానించారు. ఎపిఐఐసిపై ఐదేళ్లుగా రాని అనుమానాలు ఇప్పుడే వచ్చాయా అని ఆయన ప్రశ్నించారు. ప్రభుత్వం కొనసాగాలని, తాను కాంగ్రెసు పార్టీలో ఉండాలని జగన్ భావిస్తున్నారని ఆయన చెప్పారు.

కడప జిల్లా పేరును మార్చడాన్ని డిఎల్ రవీంద్రా రెడ్డి రాజకీయం చేస్తున్నారని ఆదినారాయణ రెడ్డి విమర్శించారు. ఆరోపణలు, విమర్శల ద్వారా ముఖ్యమంత్రి రోశయ్యకు దగ్గర కావచ్చునని డిఎల్, జెసి భావిస్తున్నారని ఆయన అన్నారు. వైయస్ పేరును అప్రతిష్టపాలు చేయడానికి కాంగ్రెసులోనివారే విపక్షాలతో చేతులు కలిపుతున్నారని ఆయన అన్నారు.