హైకమాండ్ పూర్తి స్థాయి సమరం: జగన్ వర్గంలో కలవరం

న్యూఢిల్లీ: తమ పార్టీ పార్లమెంటు సభ్యుడు వైయస్ జగన్ పై కాంగ్రెసు అధిష్టానం పూర్తి స్థాయి సమరానికి సన్నద్ధమైంది. చివరగా పార్లమెంటు సభ్యుడు, ఢిల్లీ ముఖ్యమంత్రి షీలా దీక్షిత్ తనయుడు సందీప్ దీక్షిత్ జరిపిన చర్చలు కూడా విఫలం కావడంతో జగన్ ను ఇక ఏ మాత్రం సహించకూడదనే నిర్ణయానికి వచ్చినట్లు తెలుస్తోంది. అన్ని వైపుల నుంచి జగన్ ను ఇరకాటంలో పెట్టే చర్యలకు దిగుతోంది. ఓదార్పు యాత్రను అపడమే సంధికి ప్రాతిపదిక అయితే తాను అంగీకరించేది లేదని జగన్ స్పష్టం చేసినట్లు సమాచారం. అది వ్యక్తిగతమని, అందువల్ల దాన్ని ఆపే ప్రసక్తి లేదని ఆయన స్పష్టం చేసినట్లు తెలుస్తోంది. దీంతో జగన్ లొంగి రావడం సాధ్యం కాదని పార్టీ అధిష్టానం కచ్చితమైన నిర్ణయానికి వచ్చినట్లు చెబుతున్నారు.

కొండా సురేఖ, అంబటి రాంబాబు వంటి జగన్ వర్గీయులపై చర్యలు పూనుకుని పరీక్షించిన హైకమాండ్ ఇప్పుడు నేరుగా జగన్ ను టార్గెట్ చేసుకునే అవకాశం ఉంది. అందులో భాగంగానే ఎమ్మార్ ప్రాపర్టీస్ కుంభకోణాన్ని శాసనసభ్యులు డిఎల్ రవీంద్రా రెడ్డి, జెసి దివాకర్ రెడ్డి బయట పెట్టినట్లు భావిస్తున్నారు. పలు ఆర్థిక అక్రమాలకు సంబంధించిన చిట్టా కూడా అధిష్టానం వద్ద ఉన్నట్లు సమాచారం. 2004-09 మధ్య జరిగిన అక్రమాలపై పూర్తిస్థాయిలో దర్యాప్తు చేయించాలంటూ ఆధారాలు జత చేస్తూ అధిష్టానానికి ఫిర్యాదులు పంపుతున్నారు. ఇప్పటికీ బయ్యారం గనులు, రామగుండం జాతీయ రహదారి పనులు, ఎమ్మార్ ప్రాపర్టీస్, రహేజా వ్యవహారాలపై ఫిర్యాదులు అందాయి. ఏపీఐఐసీలో అక్రమాలపై విచారణకు మాజీ మంత్రులు డీఎల్, జేసీ డిమాండ్ చేశారు. అప్పట్లో పరిశ్రమల శాఖను చూసిన మంత్రి బొత్స సత్యనారాయణ ఢిల్లీకి వెళ్లడం చర్చనీయాంశంగా మారింది.