హరికృష్ణ తల్లిపాలు తాగి తండ్రి రొమ్ము గుద్దాడు: జీవన్ రెడ్డి

హైదరాబాద్: తల్లి పాలు తాగి తండ్రి రొమ్ము గుద్దిన చరిత్ర తెలుగుదేశం రాజ్యసభ సభ్యుడు హరికృష్ణ అని కాంగ్రెసు తెలంగాణ నాయకుడు టి. జీవన్ రెడ్డి వ్యాఖ్యానించారు. చరిత్రలో ఔరంగజేబు తల్లి పాలు తాగి తండ్రి రొమ్ము గుద్దాడని, హరికృష్ణ కూడా అలాగే చేశారని ఆయన అన్నారు. హరికృష్ణ బహిరంగ లేఖపై ఆయన గురువారం మీడియా ప్రతినిధుల సమావేశంలో తీవ్రంగా ప్రతిస్పందించారు.

1995లో ఎన్టీఆర్ పై ప్రస్తుత తెలుగుదేశం పార్టీ అధ్యక్షుడు నారా చంద్రబాబు నాయుడు హరికృష్ణను ఉసిగొల్పారని ఆయన ఆరోపించారు. రాష్ట్ర ప్రజలకు హరికృష్ణ రాసిన లేఖ వెనక చంద్రబాబు ఉన్నారని ఆయన ఆరోపించారు. కనీసం హరికృష్ణ లేఖను చదివి సంతకం పెడితే బాగుంటుందని ఆయన అభిప్రాయపడ్డారు. తెలంగాణకు వ్యతిరేకంగా మాట్లాడే నైతిక హక్కు హరికృష్ణకు లేదని ఆయన అన్నారు.