ఈనాడు, ఆంధ్రజ్యోతిలను దుయ్యబట్టిన సాక్షి డైలీ

హైదరాబాద్: ఈనాడు, ఆంధ్రజ్యోతి దినపత్రికలపై, టీవీ చానెళ్లపై కాంగ్రెసు కడప పార్లమెంటు సభ్యుడు వైయస్ జగన్ కు చెందిన సాక్షి దినపత్రిక తీవ్రంగా విరుచుకుపడింది. జగన్ ఓదార్పు యాత్రకు సంబంధించిన వార్తాకథనాలపై సాక్షి తీవ్రంగా దయ్యబట్టింది. వైయస్ జగన్ ఓదార్పు యాత్రపై తప్పు వార్తాకథనాలను ఆ రెండు దినపత్రికలు ప్రచురించాయని, టీవీ చానెళ్లు ప్రసారం చేశాయని ఆరోపించింది. గోబెల్స్ గేమ్ అనే శీర్షిక కింద మొన్నటి వరకు వైస్సార్ పై కుట్ర.. ఇప్పుడు యువనేత టార్గెట్ అనే ఉప శీర్షికను పెట్టి తీవ్రమైన వ్యాఖ్యలతో వార్తాకథనాన్ని ప్రచురించింది. ప్రజలకు జగన్ ను, జగన్ కు అధిష్టానాన్ని దూరం చేయడమే ఆ పత్రికల లక్ష్యమని ఆరోపించింది. దొరికిందే సందుగా కాంగ్రెసు విచ్ఛిన్నానికి ఎల్లో సిండికేట్ ఎత్తులు వేస్తోందని వ్యాఖ్యానించింది.

ఓదార్పు యాత్రలో కాంగ్రెసు నేతలెవరూ పాల్గొనరాదని హైకమాండ్ ఆదేశించినట్టు రెండు రోజులుగా తప్పుడు ప్రచారం సాగిస్తున్నాయని సాక్షి దినపత్రిక విరుచుకుపడింది. ఢిల్లీలో హై డ్రామా ... అంతా అబద్ధమని తేలడంతో తుస్సుమన్న లీకువీరులని వ్యాఖ్యానించింది. ఓదార్పు యాత్రకు వెళ్లొద్దని అధిష్టానం ఆదేశించిందంటూ శుక్రవారం సాయంత్రం ఎబిఎన్ - ఆంధ్రజ్యోతి వార్తాకథనాన్ని ప్రసారం చేసింది. అలాగే, ఓదార్పు యాత్రకు వెళ్లొద్దని తన మాటగా ప్రజాప్రతినిధులకు, నాయకులకు చెప్పాలని సోనియా గాంధీ రాష్ట్రానికి చెందిన ఓ కేంద్ర మంత్రితో అన్నట్లు కూడా ఆ వార్తాకథనం ప్రసారమైంది. దానిపై సాక్షి దినపత్రిక తీవ్రంగా మండిపడింది. ఆ రెండు దినపత్రికలు గత రెండు రోజులుగా జగన్ పై విషప్రచారం చేస్తున్నాయని ఆరోపించింది.

ఆ రెండు దినపత్రికల కథనాలపై కాంగ్రెసు ఆంధ్రప్రదేశ్ వ్యవహారాల ఇంచార్జీ మండిపడినట్లు సాక్షి దినపత్రిక రాసింది. చెత్త కథనాలు.. నిరాధార కథనాలు... ఇష్టమొచ్చినట్లు రాసేయడం, ప్రసారం చేయడం.. వీటిపై మీరొచ్చి నన్ను అడగడం.. మీకు వేరే పని లేదా అని మొయిలీ మండిపడినట్లు సాక్షి దినపత్రిక రాసింది. ఓదార్పు యాత్రలో పాల్గొనవద్దని ఆదేశాలు జారీ కాలేదని పలువురు పార్లమెంటు సభ్యులు చెప్పినట్లు కూడా సాక్షి దినపత్రిక రాసింది. ఈ రెండు సంస్థల వార్తాకథనాల వల్ల తెలుగు మీడియా పరువు జాతీయ స్థాయిలో పోయిందని సాక్షి దినపత్రిక ఆవేదన వ్యక్తం చేసింది.