వైయస్ జగన్ కోసం కెవిపి రామచందర్ రావు రాయబారం

న్యూఢిల్లీ: ఇటు ముఖ్యమంత్రి కె. రోశయ్యకు సన్నిహితంగా ఉంటూనే కడప పార్లమెంటు సభ్యుడు వైయస్ జగన్ కు ఆప్తుడిగా మెలుగుతున్న రాజ్యసభ సభ్యుడు కెవిపి రామచందర్ రావు పార్టీ అధిష్టానంతో రాయబారం నెరుపుతున్నారు. జగన్ ను ప్రస్తుత స్థితి నుంచి బయటపడేసేందుకు ఆయన ప్రయత్నిస్తున్నట్లు సమాచారం. సెప్టెంబర్‌ 3న ఓదార్పు యాత్ర చేపడితే చర్యలు తప్పవని ఆర్థికమంత్రి ప్రణబ్‌ ముఖర్జీ జగన్ ‌ను హెచ్చరించిన నేపథ్యంలో ఆయన జగన్ తరఫున రాయబారం నెరపడానికే మంగళవారం సాయంత్రం అహ్మద్ ‌పటేల్ ‌ను కలిసినట్లు చెబుతున్నారు. పార్టీ ఆదేశాల ప్రకారం నడుచుకొనేలా జగన్‌కు నచ్చజెబుతున్నామని, అందుకు కొంత సమయం ఇవ్వాలని అహ్మద్‌పటేల్‌కు విజ్ఞప్తి చేశారని సమాచారం.

అయితే కాంగ్రెస్‌ అధిష్ఠానం జగన్‌ వైఖరిపై పూర్తిస్థాయిలో అసంతృప్తి వ్యక్తంచేసినట్లు తెలుస్తోంది. ఓదార్పు యాత్ర మానుకోవాల్సిందేనని స్పష్టం చేసినట్లు సమాచారం. ఎంతటి వారైనా పార్టీ గీసిన లక్ష్మణరేఖకు లోబడే ఉండాలని, ప్రజాదరణ ఉందన్న పేరుతో ఇష్టానుసారం వ్యవహరిస్తే సహించేది లేదని పేర్కొన్నట్లు తెలిసింది. ఎవరు ఎక్కడ ఉండాలో అక్కడే ఉండాలని అన్నట్లు తెలుస్తోంది. పార్టీ లక్ష్మణ రేఖకు లోబడి జగన్‌ నడుచుకోకపోతే చర్యకు ప్రతి చర్య ఉంటుందని కుండబద్ధలు కొట్టినట్లు సమాచారం. జాతీయ పార్టీ ఇలాంటి బెదిరింపులకు భయపడదని కూడా స్పష్టం చేసినట్లు సమాచారం.