డిసెంబర్ వరకూ పిసిసి అధ్యక్షుడిగా శీనన్నే

న్యూఢిల్లీ: తక్షణమే ప్రదేశ్ కాంగ్రెసు కమిటీ (పిసిసి) అధ్యక్షుడి మార్పు ఉంటుందనే ప్రచారానికి కాంగ్రెసు పార్టీ అధిష్టానం తెర దించింది. పిసిసి చీఫ్ మార్పు ఇప్పట్లో ఉండదని తేల్చి చెప్పింది. ఈ ఏడాది డిసెంబర్ వరకు పిసిసి అధ్యక్షుడిగా డి. శ్రీనివాస్ కొనసాగే అవకాశాలున్నాయి. పార్టీ అధ్యక్షురాలు సోనియా గాంధీని డిఎస్ కలిసిన తర్వాత మొత్తం సీన్ మారిపోయిందని అంటున్నారు. వైయస్ జగన్ కు చెక్ పెట్టేందుకు రెడ్డి వర్గానికి చెందిన తెలంగాణ నాయకుడిని పిసిసి చీఫ్ గా నియమించే అవకాశాలున్నాయని ప్రచారం జరిగింది. శాసనసభ మాజీ స్పీకర్ కెఆర్ సురేష్ రెడ్డి పార్టీ అధిష్టానం నాయకులను కలవడం వల్ల ఆ ప్రచారం ఊపందుకుంది.

తనను పిసిసి చీఫ్ గా తప్పించాలని డిఎస్ సోనియా గాంధీకి విజ్ఞప్తి చేసినప్పటికీ డిసెంబర్ వరకు కొనసాగాలని ఆమె సూచించినట్లు సమాచారం. డిఎస్ కొనసాగాలని తెలంగాణ నాయకులే కాకుండా సీమాంధ్ర నాయకులు కూడా కోరుకుంటున్నారు. డిఎస్ ను కొనసాగించాలనే నిర్ణయం వెనక అది ఒక కారణమని అంటున్నారు. అంతేకాకుండా, రాష్ట్ర పరిస్థితిపై వేసిన శ్రీకృష్ణ కమిటీ డిసెంబర్ చివరలో తన నివేదికను సమర్పించనుంది. శ్రీకృష్ణ కమిటీ నివేదికను బట్టి రాష్ట్ర నాయకత్వంలో మార్పు చేయాలనే ఆలోచన ఆధిష్టానంలో ఉన్నట్లు తెలుస్తోంది.

శ్రీకృష్ణ కమిటీ తెలంగాణ రాష్ట్ర ఏర్పాటుకు అనుకూలంగా తన నివేదికను సమర్పిస్తే ఒక రకంగా, వ్యతిరేకంగా సమర్పిస్తే మరో రకంగా నాయకత్వ మార్పు చేయాలని అధిష్టానం ఆలోచిస్తున్నట్లు తెలుస్తోంది. పైగా, రాష్ట్ర విభజనపై పార్టీ అధిష్టానం ఇప్పటికే ఓ నిర్ణయానికి వచ్చిందని, దానిపై కచ్చితమైన తమ నిర్ణయాన్ని మరోసారి వెల్లడించి, అందుకు అనుగుణంగా చర్యలు చేపట్టిన తర్వాత పిసిసి మార్పు చేయాలని కూడా అధిష్టానం అనుకుంటున్నట్లు తెలుస్తోంది.