వ్యతిరేకులపై ఓదార్పు యాత్రలో ధ్వజమెత్తిన వైయస్ జగన్

ఒంగోలు: తన వ్యతిరేకులపై కాంగ్రెసు కడప పార్లమెంటు సభ్యుడు వైయస్ జగన్ తన ఓదార్పు యాత్రలో తీవ్రంగా ధ్వజమెత్తారు. ఆయన బుధవారంనాడు చినారికట్టలో దివంగత నేత వైయస్ రాజశేఖర రెడ్డి విగ్రహాన్ని ఆవిష్కరించి మాట్లాడారు. మరణించిన తర్వాత కూడా వైయస్ రాజశేఖర రెడ్డిని కొంత మంది రాజకీయ నాయకులు వదిలిపెట్టడం లేదని, వైయస్సార్ పై నిందలూ అపనిందలూ వేస్తున్నారని ఆయన అన్నారు. వైయస్సార్ పై విమర్శలు చేస్తుండడాన్ని గమనిస్తే కొంత మంది నాయకులు ఎంతటి నీచ రాజకీయాలకు పాల్పడుతున్నారో అర్థమవుతోందని ఆయన అన్నారు.

వైయస్సార్ పై విమర్శలు చేస్తున్న నాయకులు జనాభిమాన ప్రవాహంలో కొట్టుకుపోతారని ఆయన అన్నారు. ప్రజల గుండెలు వైయస్సార్... వైయస్సార్...అంటూ కొట్టుకుంటున్నాయని ఆయన అన్నారు. వైయస్సార్ పై అభిమానంతో ప్రజలు తనను ఆదరిస్తున్నారని, ఆప్యాయత చూపుతున్నారని ఆయన అన్నారు. ఈనాడు రామోజీరావుపై నేరుగా విమర్శలు చేసిన జగన్ బుధవారంనాడు వైయస్సార్ పై విమర్శలు చేస్తున్న తెలుగుదేశం పార్టీ అధ్యక్షుడు నారా చంద్రబాబు నాయుడిని, ఇతర నాయకులను దృష్టిలో పెట్టుకుని మాట్లాడారు.