వైయస్ జగన్ కి సపోర్టు చేసినందుకే వీరప్ప మొయిలీపై వేటు?

హైదరాబాద్: ఈనెల 17వ తేదీతో కాంగ్రెస్ పార్టీ రాష్ట్ర వ్యవహారాల ఇన్‌చార్జి వీరప్ప మొయిలీ ని తొలిగిస్తారనే వార్తలు అంతటా వినపడుతున్నాయి. మెయిలీ...జగన్ వర్గానికి అనుకూలం కావటంతో ముఖ్యమంత్రి రోశయ్య పార్టీ వ్యవహారాలపై మొయిలీతో స్వేచ్ఛగా తన అభిప్రాయాలు పంచుకోలేకపోతున్నారు. అలాగని...ఆయనతో మాట్లాడకుండా కీలక నిర్ణయాలు తీసుకోలేకపోతున్నారనే ఆరోపణ ఉంది. అలాగే ఏఐసీసీ కొత్త కార్యవర్గం ఏర్పడిచి, రాష్ట్రాలకు కొత్త ఇన్‌చార్జులని వేస్తారని వినపడుతోంది.

రాష్ట్ర పార్టీ వ్యవహారాల బాధ్యతలను మొయిలీ స్థానంలో మరొకరికి అప్పగించనున్నారు. ఆ తర్వాత రాష్ట్రంలో పలు మార్పులు జరగడం ఖాయమని, ఈ నెలాఖరుకు మంత్రివర్గ పునర్‌వ్యవస్థీకరణ జరుగుతుందని చెప్తున్నారు.

ఇక మొయిలీని మార్చేదాకా ఎన్ని పరిణామాలు చోటు చేసుకున్నా ఊరుకోవాలని, అధిష్ఠానం ముందు కీలక నిర్ణయాల ప్రతిపాదనలేవీ పెట్టరాదని రోశయ్య తీర్మానించుకున్నట్లు తెలిసింది. కొత్త ఇన్‌ చార్జిని నియమించగానే రోశయ్య ఢిల్లీకి వెళ్లి...మంత్రివర్గ పునర్ వ్యవస్థీకరణపై చర్చించనున్నారు. ఆ తర్వాత ఈ నెలాఖరుకు మంత్రివర్గాన్ని ప్రక్షాళన చేయనున్నారు. ఇందులో భాగంగా ఐదారుగురిపై వేటు వేయడంతోపాటు...కొత్త వారిని తీసుకొని సీనియర్ ఎమ్మెల్యేల్లో అసంతృప్తిని పోగొట్టే ప్రయత్నం చేస్తారని సమాచారం.