రవీంద్రనాథ్ రెడ్డిని ప్రశ్నించినందుకు కార్పొరేటర్ అమీర్ బాబాపై దాడి

కడప: మేయర్ రవీంద్రనాథ్ రెడ్డి ఎరువుల అక్రమాలపై ప్రశ్నించినందుకు తెలుగుదేశం కార్పొరేటర్ అమీర్ బాబు కాంగ్రెసు కార్పొరేటర్ల దౌర్జన్యాన్ని చవి చూడాల్సి వచ్చింది. కాంగ్రెసు కార్పొరేటర్లు అమీర్ బాబు చొక్కా పట్టుకుని కార్పోరేషన్ సమావేశం హాల్ నుంచి బయటకు లాక్కొచ్చారు. బుధవారం కార్పొరేషన్ సమావేశంలో అమీర్ బాబు రవీంద్రనాథ్ రెడ్డి ఎరువుల అక్రమాలపై ప్రశ్నించారు. ఎరుపుల అక్రమ రవాణాపై సమావేశంలో చర్చించాలని తెలుగుదేశం కార్పొరేటర్లు పట్టుబట్టారు. అందుకు మేయర్ రవీంద్రనాథ్ రెడ్డి అంగీకరించలేదు.

ఎరువుల అక్రమాలపై 420 కేసును ఎదుర్కుంటున్న రవీంద్రనాథ్ రెడ్డి సమావేశానికి అధ్యక్షత వహించడానికి అనర్హుడని అమీర్ బాబా అన్నారు. దానికి రెచ్చిపోయిన కాంగ్రెసు కార్పొరేటర్లు ఆయనపై దాడికి ఒడిగట్టి, సమావేశం బయటకు చొక్కా పట్టుకుని లాక్కొచ్చారు. కాంగ్రెసు కార్పొరేటర్లు గూండాల్లాగా వ్యవహరించారని అమీర్ బాబు విమర్శించారు. కడప చరిత్రలో ఇటువంటి సంఘటన ఇంతకు ముందు జరగలేదని ఆయన మీడియా ప్రతినిధులతో అన్నారు.