కె చంద్రశేఖర రావు సిఇవోల సమావేశంపై చంద్రబాబు ఫైర్

హైదరాబాద్: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు వివిధ ప్రైవేట్ కంపెనీల సిఇవోల సమావేశంలో పాల్గొనడంపై తెలుగుదేశం పార్టీ అధ్యక్షుడు నారా చంద్రబాబు నాయుడు తీవ్రంగా మండిపడ్డారు. తెలంగాణ రాష్ట్రం విషయంలో కెసిఆర్ పగటి కలలు కంటున్నారని, అందుకే సిఇవోల సమావేశం ఏర్పాటు చేశారని, ఏవేవో ప్రకటనలు చేస్తున్నారని ఆయన గురువారం మీడియా ప్రతినిధుల సమావేశంలో అన్నారు. అధికారంలో లేకుండా సిఇవోల సమావేశంలో కెసిఆర్ పాల్గొనడం ప్రజాస్వామ్యంలో సరి కాదని ఆయన అన్నారు.

అలూ లేదు చూలు లేదు కొడుకు పేరు సోమలింగం అన్నట్లుగా కెసిఆర్ వ్యవహరిస్తున్నారని ఆయన ఎత్తి పొడిచారు. ఎవరు అధికారంలో ఉంటే వారు సిఇవోలతో మాట్లాడుతారని ఆయన అన్నారు. కెసిఆర్ తీరు ఏ మాత్రం సరి కాదని ఆయన అన్నారు. రాష్ట్రంలో ప్రభుత్వాన్ని వెతుక్కోవాల్సిన పరిస్థితి ఉందని ఆయన అన్నారు. ముఖ్యమంత్రి కె. రోశయ్య కడప మేయర్ రవీంద్రనాథ్ రెడ్డి సమావేశం కావడాన్ని ఆయన తప్పు పట్టారు. 420 కేసును ఎదుర్కుంటున్న వ్యక్తితో ముఖ్యమంత్రి ఎలా సమావేశమవుతారని ఆయన ప్రశ్నించారు.