మన దేశం పరువు పోయింది: కామన్ వెల్త్ పై చంద్రబాబు

హైదరాబాద్: కామన్ వెల్త్ క్రీడల ఏర్పాట్ల విషయంలో దేశ పరువు పోయిందని తెలుగుదేశం పార్టీ అధ్యక్షుడు నారా చంద్రబాబు నాయుడు వ్యాఖ్యానించారు. అక్రమాలు బయటపడిన వెంటనే సురేష్ కల్మాడీపై చర్యలు తీసుకుంటే దేశం పరువు పోయేది కాదని ఆయన గురువారం మీడియా ప్రతినిధుల సమావేశంలో అన్నారు. ప్రధాని మన్మోహన్ సింగ్, యుపిఎ చైర్ పర్సన్ సోనియా గాంధీ ఎందుకు మౌనంగా ఉన్నారని ఆయన ప్రశ్నించారు. కామన్ వెల్త్ క్రీడల ఏర్పాట్లకు 40 వేల కోట్ల రూపాయలు కేటాయించారని, దేశ రాజధానిలోనే భారీ కుంభకోణం జరిగిందని ఆయన అన్నారు. అవినీతికి పాల్పడుతున్న నిర్వాహకులతో దేశ నాయకత్వం కూడా లూలాచీ పడిందని, అందుకే చర్యలు తీసుకోలేదని ఆయన విమర్శించారు.

తాము ఏం చేసినా అడిగేవారు లేరని ఇష్టానుసారంగా వ్యవహరించారని ఆయన వ్యాఖ్యానించారు. భద్రతా ఏర్పాట్లు కూడా సరిగా లేవని ఆయన అన్నారు. మీడియా ప్రతినిధులు ఆయుధాలతో లోపలికి వెళ్లినా అడిగే వారు లేరని ఆయన అన్నారు. దేశం ఏమైనా ఫరవాలేదు తమకు డబ్బులు వస్తే చాలనే పద్ధతిలో కేంద్ర ప్రభుత్వం వ్యవహరించిందని ఆయన అన్నారు. ఢిల్లీలో మరో వైపు ఉగ్రవాద చర్యలకు అవకాశం ఉందని ఆస్ట్రేలియా లాంటి దేశాలు ఆందోళన వ్యక్తం చేస్తున్నాయని ఆయన అన్నారు. కెనడా, న్యూజిలాండ్ దేశాలు తమ జట్లను పంపేందుకు నిరాకరిస్తున్నాయని ఆయన అన్నారు.