దేశం పరువు తీసిన కేంద్ర మంత్రి జైపాల్ రెడ్డి

న్యూఢిల్లీ: కామన్ వెల్త్ క్రీడల నిర్వహణ విషయంలో ఆంధ్రప్రదేశ్ కు చెందిన కేంద్ర పట్టణాభివృద్ధి మంత్రి ఎస్ జైపాల్ రెడ్డి ప్రపంచవ్యాప్తంగా దేశం పరువు పోయే స్థితిని తీసుకు వచ్చారనే విమర్సలు వినిపిస్తున్నాయి. కామన్ వెల్త్ గ్రామం నాసిరకం నిర్మాణాలు ఒక్కటొక్కటే బయటపడుతున్నాయి. ఈ స్థితిలో కామన్ వెల్త్ క్రీడల నుంచి వివిధ దేశాలకు చెందిన క్రీడాకారులు ఒక్కరొక్కరే తప్పుకుంటున్నారు. క్రీడలను ప్రతిష్టాత్మకంగా నిర్వహించాలనే భారత ప్రభుత్వ కలలను ఆయన వమ్ము చేశారనే వ్యాఖ్యలు వినిపిస్తున్నాయి. నిర్వహణ బాధ్యతల నుంచి విమర్సలు, ఆరోపణలు వచ్చినప్పుడే సురేష్ కల్మాడీని తప్పించుకుండా ఎందుకు కాపు కాశారనేది ప్రశ్నార్థకంగా మారింది.

జైపాల్ రెడ్డిపై జాతీయ టీవీ చానెళ్లు తీవ్రమైన వ్యాఖ్యలు చేస్తున్నాయి. ఓ టీవీ చానెల్ జైపాల్ రెడ్డిని ఇండియాస్ మోస్ట్ అన్ వాంటెడ్ గా వ్యాఖ్యానించింది. మరో చానెల్ జైపాల్ రెడ్డి - మ్యాన్ హూ పుట్ ఇండియా టు షేమ్ శీర్షికతో వార్తాకథనాన్ని ప్రసారం చేసింది. జైపాల్ రెడ్డికి ఇప్పటి వరకు మేధావిగా, పార్లమెంటేరియన్ గా, వివాదరహితుడిగా పేరుంది. కామన్ వెల్త్ క్రీడలతో దేశ ప్రతిష్టనే మంట కలిపిన జైపాల్ రెడ్డి రాజకీయ, వ్యక్తిగత జీవితంపై కామన్ వెల్త్ క్రీడల వ్యవహారం ఒక మచ్చగా మిగిలిపోతుందనడంలో సందేహం లేదు.