పండు హత్య: నిందితుల కారుపై ఎమ్మెల్యే రామకృష్ణ స్టిక్కర్

హైదరాబాద్: తెలుగుదేశం నాయకుడు చలసాని వెంకటేశ్వర రావు అలియాస్ పండు హత్య చేసినవారు వాడిన కారుకు విశాఖపట్నం శాసనసభ్యుడు వెలగపూడి రామకృష్ణ స్టిక్కర్ ఉండడం తీవ్ర సంచలనం సృష్టించింది. పండును హత్య చేయడానికి వచ్చినవారు తమ కారును స్వప్నిక అపార్టుమెంటు ముందు వదిలి పారిపోయారు. ఆ కారుపై ఎమ్మెల్యే స్టిక్కర్ ఉంది. దీనిపై శాసనసభ్యుడు వెలగపూడి రామకృష్ణ వివరణ ఇచ్చారు. తాను ఆ స్టిక్కర్ ను ఉత్తరాంధ్ర నాయకుడు గద్దె బాబూరావుకు ఇచ్చినట్లు ఆయన తెలిపారు. ఆ స్టిక్కర్ ఆ కారుకు ఎలా వచ్చిందో తనకు తెలియదని ఆయన అన్నారు.

బాబూరావుతో తనకున్న సాన్నిహిత్యం వల్లనే ఆ స్టిక్కర్ ను ఇచ్చానని ఆయన చెప్పారు. పండు హత్య ఎందుకు జరిగిందో తనకు తెలియదని ఆయన అన్నారు. హత్యకు భూవివాదాలో, మరేమిటో తనకు తెలియదని ఆయన అన్నారు. రాజీ కోసమే పండు హత్య జరిగినట్లు ఆయన అనుమానించారు. చలసాని వెంకటేశ్వర రావు తనకు బంధువు కూడా అని ఆయన చెప్పారు.