ఇక కాంగ్రెసు తెలంగాణ నేతల ఓదార్పు: కరీంనగర్ లో సభ

హైదరాబాద్: ఓ వైపు కాంగ్రెసు కడప పార్లమెంటు సభ్యుడు వైయస్ జగన్ ఓదార్పు యాత్ర సాగుతుండగా కాంగ్రెసు తెలంగాణ నేతలు తమ ప్రాంతంలో ఓదార్పు కార్యక్రమానికి శ్రీకారం చుడుతున్నారు. తెలంగాణ కోసం అసువులు బాసినవారి కుటుంబాలకు ఆదుకోవాలని నిర్ణయం తీసుకున్నారు. తెలంగాణ కోసం మరణించినవారి కుటుంబాలకు లక్ష రూపాయలేసి ఆర్థిక సాయం చేయాలని వారు నిర్ణయించారు. పార్లమెంటు సభ్యుడు జి. వివేక్ నివాసంలో మంగళవారం జరిగిన సమావేశంలో ఈ మేరకు నిర్ణయం తీసుకున్నారు. తెలంగాణ కోసం ప్రాణాలర్పించినవారి కుటుంబాలను జిల్లా పార్టీ శ్రేణులు గుర్తిస్తాయని కాంగ్రెసు సీనియర్ శాసనసభ్యుడు కె. జానా రెడ్డి మీడియా ప్రతినిధులతో చెప్పారు.

తెలంగాణ త్యాగధనులకు ఆర్థిక సాయం అందించే కార్యక్రమ కమిటీకి జి వివేక్ చైర్మన్ గా వ్యవహరిస్తారని, కమిటీలో పది మంది సభ్యులుంటారని ఆయన చెప్పారు. కరీంనగర్ లో వచ్చే నెల 2వ తేదీన తెలంగాణ త్యాగధనుల సంస్మరణ సభ నిర్వహించనున్నట్లు ఆయన తెలిపారు. తాము తెలంగాణ అధిష్టానానికి వ్యతిరేకంగా వ్యవహరించడం లేదని, తెలంగాణపై అధిష్టానం తీసుకున్న నిర్ణయం మేరకే కార్యక్రమాలు రూపొందించుకుంటున్నామని పార్లమెంటు సభ్యుడు మందా జగన్నాథం చెప్పారు.