మహిపాల్ రెడ్డి ఎలా గుల్బర్గాకు పారిపోయాడు?

హైదరాబాద్: తెలుగుదేశం పార్టీ నాయకుడు చలసాని వెంకటేశ్వర రావు అలియాస్ పండు హత్య కేసులో ప్రధాన నిందితుడు మహిపాల్ రెడ్డి అలియాస్ మహేందర్ రెడ్డి గుల్బర్గా పారిపోయిన విషయాన్ని పోలీసులు జాగ్రత్తగా ఛేదించారు. పండును హత్య చేసిన తర్వాత మహేందర్ రెడ్డి తన భార్యకు ఫోన్ చేసి ఊరికి వెళ్లడానికి సిద్దంగా ఉండాలని చెప్పాడని సమాచారం. తెలిసిన వివరాల ప్రకారం - హత్య జరిగిన వెంటనే తన సెల్ ఫోన్ స్విచాఫ్ చేశాడు. ఇంటికి వెళ్లిన వెంటనే భార్య ఫోన్ తో ఓ కారును ఎంగేజ్ చేసుకున్నాడు. ఆ కారులో భార్యాపిల్లలతో కలిసి నల్లగొండ జిల్లా యాదగిరిగుట్టకు వెళ్లి అక్కడ ఓ గదిలో ఉన్నాడు.

మర్నాడు ఉదయం టీవీ చానెళ్లలో పండు హత్యకు సంబంధించిన వార్తలు, తనపై వార్తాకథనాలు ప్రసారం అవుతుండడం చూసి భార్యాపిల్లలను అక్కడే వదిలేసి గుల్బర్గాకు పారిపోయాడు. భర్త పారిపోయిన తర్వాత వరంగల్ జిల్లాలోని స్వగ్రామం వెళ్లేందుకు మహేందర్ రెడ్డి భార్య బయలుదేరింది. ఈ సమయంలో పోలీసులు ఆమెను పట్టుకుని ప్రశ్నించారు. ఈ సమయంలో ఆమెనుంచి కొన్ని విషయాలను పోలీసులు రాబట్టారు. దీంతో ప్రత్యేక బృందం గుల్బర్గా వెళ్లి మహేందర్ రెడ్డిని అదుపులోకి తీసుకుంది.