భూవివాదం కమిషనే టిడిపి నేత పండు ప్రాణం తీసింది

హైదరాబాద్: విశాఖపట్నంలోని 22 ఎకరాల స్థలం వివాదమే తెలుగుదేశం పార్టీ నాయకుడు చలసాని వెంకటేశ్వర రావు అలియాస్ పండు ప్రాణం తీసిందని పోలీసుల విచారణలో వెల్లడైంది. పండును తానే హత్య చేసినట్లు మహేందర్ రెడ్డి పోలీసు విచారణలో వెల్లడించినట్లు సమాచారం. ఆ స్థలం విషయంలో తనకు 20 లక్షల రూపాయల కమిషన్ అడిగానని, అందుకు పండు నిరాకరించాడని, దాంతో ఇద్దరి మధ్య ఆ రోజు గొడవ జరిగిందని మహేందర్ రెడ్డి చెప్పాడు. పండు తనను చంపేస్తాడనే భయంతో తాను పండును చంపేసినట్లు మహేందర్ రెడ్డి చెప్పాడు.

తనను పండు కాలితో తన్నాడని, దీంతో తాను బాటిల్ తో పండును కొట్టానని అతను చెప్పాడు. ఆ తర్వాత యాదగిరిగుట్టకు పారిపోయానని, టీవీ చానెళ్లలో వార్తలు వస్తుండడంతో భయపడి గుల్బర్గాకు పారిపోయానని అతను చెప్పాడు. పోలీసులు తన భార్యాపిల్లలను పట్టుకుని విచారిస్తుండడంతో గుల్బర్గా పోలీసులకు లొంగిపోయాలని నిర్ణయించుకున్నానని, ఈలోగా హైదరాబాదు పోలీసులు తనను అదుపులోకి తీసుకున్నారని అతను చెప్పాడు.