పండు హత్య కేసు: గల్బర్గాలో పట్టుబడిన మహిపాల్ రెడ్డి

హైదరాబాద్: తెలుగుదేశం పార్టీ నాయకుడు చలసాని వెంకటేశ్వర రావు అలియాస్ పండు హత్య కేసులో ప్రధాన నిందితుడు మహిపాల్ రెడ్డిని పోలీసులు అదుపులోకి తీసుకున్నారు. అతన్ని కర్ణాటక రాష్ట్రంలోని గుల్బర్గాలో హైదరాబాదు పోలీసులు పట్టుకున్నట్లు సమాచారం. అతన్ని హైదరాబాద్ తరలిస్తున్నారు. హైదరాబాదుకు తీసుకువచ్చిన తర్వాత మహిపాల్ రెడ్డిని మీడియా ముందు ప్రవేశపెట్టే అవకాశం ఉంది. మహేందర్ రెడ్డి మహిపాల్ రెడ్డి వేర్వేరు కాదని, ఒక్కరేనని తెలుస్తోంది. అతన్నే మసాజ్ రెడ్డి అని కూడా పిలుస్తారు.

కాగా, పథకం ప్రకారం మహిపాల్ రెడ్డి పండును హత్య చేసినట్లు భావిస్తున్నారు. ఐదెకరాల స్థలం విషయంలో పండుకు, మహిపాల్ రెడ్డికి మధ్య వివాదం చెలరేగినట్లు సమాచారం. మద్యం సేవించిన తర్వాత మసాజ్ చేసిన మహిపాల్ రెడ్డి వేడి నీళ్లు పండుపై పోసినట్లు చెబుతున్నారు. దానికి ఆగ్రహించిన పండు మహిపాల్ రెడ్డిని కొట్టినట్లు, దాంతో ఇరువురి మధ్య ఘర్షణ జరిగిందని, ఈ ఘర్షణలో మహిపాల్ రెడ్డి పండును హత్య చేశాడని అంటున్నారు.