టిడిపి బెజవాడ నేతల విశాఖ భూభాగోతం: పండు హత్య

విజయవాడ: తెలుగుదేశం నేతల విశాఖపట్నం భూబాగోతం ఆ పార్టీ నాయకుడు చలసాని వెంకటేశ్వర రావు అలియాస్ పండు హత్యకు కారణమైంది. విశాఖపట్నంలోని బిర్లా కంపెనీకి చెందిన 24 ఎకరాల భూముల విక్రయంలో 2కోట్ల 30 లక్షల రూపాయల కమిషన్ ఇవ్వకపోవడం వల్లనే తాను పండును హత్య చేసినట్లు నిందితుడు మహేందర్ రెడ్డి మీడియాతో చెప్పాడు. ఈ భూమి వ్యవహారాన్ని తెలుగుదేశం నేతలు కంభంపాటి రామ్మోహన్ రావు, గద్దె బాబూరావు, పండు నడుపుతూ వస్తున్నారు. ఆ ముగ్గురు నేతలకు వాటాలున్నాయి. ఆ భూమిపై పవర్ ఆఫ్ అటార్నీ కంభంపాటి రామ్మెహన్ రావుకు ఉన్నట్లు తెలుస్తోంది. దాని విక్రయాన్ని కంభంపాటి పండుకు అప్పగించారు. పండు కమిషన్ కు ఒప్పందం కుదుర్చుకుని మహేందర్ రెడ్డికి అప్పగించారు. ఆ 24 ఎకరాల్లో ఏడున్నర ఎకరాలు వివాదంలో ఉన్నట్లు తెలుస్తోంది. దాన్ని కూడా విక్రయించినట్లు మహేందర్ రెడ్డి చెప్పారు. దాంతో తనకు, గుండూరావు అనే వ్యక్తికి రావాల్సిన కమిషన్ ను చెల్లించే విషయంలో పండు మొండికేశారని మహేందర్ రెడ్డి చెప్పాడు. దానిపైనే గొడవ జరిగిందని, ఆ గొడవలోనే పండు మరణించాడని మహేందర్ రెడ్డి చెప్పాడు.

కాగా, మహేందర్ రెడ్డి చెప్పిన గుండూరావు కోసం పోలీసులు ఆరా తీస్తున్నారు. ఇప్పటివరకు హైదరాబాదుపైనే ఉన్న విజయవాడ భూముల సెటిల్మెంట్లు చేసే విజయవాడ రాజకీయ నాయకుల దృష్టి ఇప్పుడు విశాఖపై పడినట్లు ఈ తాజా సంఘటన తెలియజేస్తోంది. పండు క్రమక్రమంగా ఎదుగుతూ తెలుగుదేశం నాయకుల్లో ప్రధానమై పోయారు. ఆయనకు కంభంపాటి రామ్మోహన్ రావు, గద్దె బాబూరావులతోనే కాకుండా తెలుగదేశం శాసనసభ్యుడు దేవినేని ఉమా మహేశ్వర రావు, రామకృష్ణబాబులతో వ్యాపార లావాదేవీలున్నట్లు తెలుస్తోంది. పండు భూముల సెటిల్మెంట్ వ్యవహారంలోనే ప్రాణాలు కోల్పోయాడు.