విజయవాడ కాంగ్రెసు ఎంపి లగడపాటి రాజగోపాల్ కబ్జాకోర్?

హైదరాబాద్: కాంగ్రెసు విజయవాడ పార్లమెంటు సభ్యుడు లగడపాటి రాజగోపాల్ ల్యాంకో హిల్స్ ను ఓ చీకటి సామ్రాజ్యంగా అభివర్ణిస్తూ రాజ్ న్యూస్ శుక్రవారం ఓ కథనాన్ని ప్రసారం చేసింది. ఓ గ్రామంపై లగడపాటి డేగకన్ను పడిందని వ్యాఖ్యానించింది. లగడపాటికి చెందిన ల్యాంకో హిల్స్ ఓ అక్రమాల పుట్ర అని, పచ్చని పంటపొలాలు, గుళ్లు, ఏకంగా గ్రామాన్ని ఆక్రమించుకొని ల్యాంకో హిల్స్ ను నిర్మించాడని తెలిపింది. హైదరాబాద్ సమీపంలోని మణికొండలో రైతుల పొలాలను, వారు భక్తితో పూజించే మైసమ్మ, వీరప్ప దేవాలయాలను గద్దలా కొల్లగొట్టి లగడపాటి అక్రమించుకున్నాడంది. స్మశానాల దగ్గరనుండి దేవాలయాలు, దర్గాలు కూడా వదలకుండా తన చీకటి సామ్రాజ్యాన్ని విస్తరించాడని ఆరోపించింది.

దర్గా భూములపై హైకోర్టులో పిటిషన్ దాఖలు అయ్యింది. ఇప్పుడు ఆ కేసు సుప్రీం కోర్టుకు వెళ్లింది. కాగా అక్కడ భూములు ఉన్న ప్రాంతంలో లగడపాటి పెద్ద పెద్ద అపార్టుమెంట్లు కట్టి అమ్ముకున్నాడని అంటూ ఇప్పుడు సుప్రీం కోర్టులో తీర్పు ఆయనకు విరుద్దంగా వస్తే ఫ్లాట్లు కొన్న ఆమాయకుల పరిస్థితి ఏంటని రాజ్ న్యూస్ ప్రశ్నించింది. గ్రామంతో పాటు పక్కనున్న చెరువును కూడా ఆక్రమించుకున్నారన్నారు. గ్రామం పక్కనే 23 ఎకరాల ఎల్లమ్మ చెరువును అపార్టుమెంట్ల పేరుతో అక్రమించుకుంటున్నాడని వివరించింది. లగడపాటి మణికొండలో వందల ఎకరాలు అక్రమించి కోట్లకు కోట్లు కూడగట్టాడని ఆరోపించింది.