తన భర్తను హత్య చేశారంటున్న వెంకన్న భార్య మహాలక్ష్మి

విజయవాడ: తన భర్త ఎన్ కౌంటర్ పై గజదొంగ అడపా వెంకన్న భార్య మహాలక్ష్మి అనుమానాలు వ్యక్తం చేస్తున్నారు. తన భర్త ఎన్ కౌంటర్ లో చనిపోలేదని, అతన్ని కాల్చి చంపారని ఆమె ఓ ప్రైవేట్ తెలుగు టీవీ చానెల్ ప్రతినిధితో అన్నారు. విజయవాడ కమిషనర్ సీతారామాంజనేయులును కలవడానికి మంగళవారం సాయంత్రం వెంకన్న వెళ్లాడని, అతని వద్ద పది లక్షల రూపాయలు కూడా ఉన్నాయని ఆమె చెప్పారు. తనకు చివరిసారి మంగళవారం సాయంత్రం ఏడు గంటలకు ఫోన్ చేశాడని ఆమె చెప్పారు.

తన భర్త మానభంగాలు, హత్యలు చేయలేదని, దొంగతనాలు చేసిన మాట వాస్తవమేనని, అందుకు అరెస్టు చేసి చట్టప్రకారం చర్యలు తీసుకోవాలి గానీ చంపేస్తారా అని ఆమె అన్నారు. తన భర్తను కిరాతకంగా కాల్చి చంపారని ఆమె ఆరోపిస్తున్నారు. న్యాయవాదిని వెంట పెట్టుకుని తన భర్త మంగళవారం పోలీసు కమిషనర్ వద్దకు వెళ్లాడని ఆమె చెబుతున్నారు. కాగా, ఎన్ కౌంటర్ జరిగిన స్థలంలో రెండు బీరు బాటిళ్లు కూడా ఉన్నాయి.