రెబెల్స్ కు హైకోర్టులో చుక్కెదురు: ముఖ్యమంత్రి యడ్యూరప్ప గెలిచే అవకాశం

బెంగళూర్: కర్ణాటక తిరుగుబాటు స్వతంత్ర శాసనసభ్యులకు హైకోర్టులో బుధవారం చుక్కెదురైంది. వారి పిటిషన్ ను హైకోర్టు తిరస్కరించింది. తిరుగుబాటు శాసనసభ్యులకు రేపు గురువారం జరిగే ముఖ్యమంత్రి యడ్యూరప్ప ప్రభుత్వం విశ్వాస పరీక్షలో పాల్గొనే హక్కు లేదని హైకోర్టు స్పష్టం చేసింది. దీంతో గురువారం ఉదయం 11 గంటలకు జరిగే విశ్వాస పరీక్షలో యడ్యూరప్ప సులభంగా గెలిచే అవకాశం ఏర్పడింది. గవర్నర్ హెచ్ఆర్ భరద్వాజ్ ఆదేశాలతో ముఖ్యమంత్రి రెండోసారి గురువారం బలనిరూపణకు సిద్ధపడ్డారు. విశ్వాస పరీక్షపై స్టే ఇవ్వాలనే ఐదుగురు ఇండిపెండెంట్ సభ్యుల విజ్ఞప్తిని కూడా హైకోర్టు తోసిపుచ్చింది. యడ్యూరప్పకు 106 మంది సభ్యుల బలం ఉంది. దీంతో ఆయన సులభంగా బలనిరూపణ చేసుకునే పరిస్థితి ఉంది.

ఇదిలా ఉంటే, ప్రభుత్వాన్ని ఏర్పాటు చేసే ఉద్దేశం తమకు లేదని కాంగ్రెసు ఇప్పటికే స్పష్టం చేసింది. జెడిఎస్ కు కేవలం 28 మంది సభ్యుల బలం మాత్రమే ఉంది. దీంతో ప్రభుత్వాన్ని పడగొట్టడానికి గానీ కొత్తగా ప్రభుత్వాన్ని ఏర్పాటు చేయడానికి తగిన బలం జెజిఎస్ నేత కుమారస్వామికి లేదు. కాగా, ఢిల్లీలో బిజెపి సీనియర్ నేతలు బుధవారం సాయంత్రం ప్రధాని డాక్టర్ మన్మోహన్ సింగ్ ను కలిశారు. కర్ణాటక గవర్నర్ హెచ్ఆర్ భరద్వాజ్ ను రీకాల్ చేయాలని వారు ప్రధానిని కోరారు.