తల్లిని, భార్యను చంపి, పోలీసులకు లొంగిపోయిన కిరాతకుడు

కర్నూలు: ఓ వ్యక్తి తన భార్యను, తల్లిని హత్య చేసి పోలీసుల ఎదుట లొంగిపోయిన సంఘటన కర్నూలు జిల్లాలో జరిగింది. కర్నూలు జిల్లా ఎమ్మిగనూరులోని ఉప్పరవీధిలో వీరేష్ అనే వ్యక్తి శనివారం తెల్లవారు జామున తన తల్లిని, భార్యను హత్య చేశాడు. రోకలిబండతో మోది వారిని హత్య చేసి ఆ తర్వాత పోలీసు స్టేషనుకు వచ్చి లొంగిపోయాడు. వీరేష్ తలకు కూడా తీవ్రమైన గాయాలయ్యాయి.

వీరేష్ తాపీ పని చేస్తుంటాడు. రోజూ సాయంత్రం తాగి వస్తుంటాడని స్థానికులు చెప్పారు. భార్యను, తల్లిని ఎందుకు వీరేష్ హత్య చేశాడనే విషయం తెలియడం లేదు. అతను కూడా ఏమీ చెప్పలేదు. అతని మానసిక స్థితి సరిగా లేదని పోలీసులు అంటున్నారు. కుటుంబ సమస్యలే కారణమై ఉండవచ్చునని అంటున్నారు.