ఉస్మానియా విశ్వవిద్యాలయంలో మళ్లీ ఉద్రిక్తత, విద్యార్థుల అరెస్టు

హైదరాబాద్: సోమవారం ఉస్మానియా యూనివర్సిటీలో ఉద్రిక్త వాతావరణం నెలకొంది. నవంబర్ 1వ తేదిన ఆంధ్ర ప్రదేశ్ అవతరణ దినోత్సవానికి నిరసనగా ఉస్మానియా విశ్వవిద్యాలయ విద్యార్థులు భారీ ర్యాలీ, ధర్నా నిర్వహించారు. విద్యార్థులు అందరూ నల్ల జెండాలు పట్టుకొని నిరసన తెలిపారు. ఆర్ట్స్ కళాశాల ముందు విద్యార్థులు భారీ సంఖ్యలో చేరి జై తెలంగాణ అంటూ ప్రభుత్వానికి, ఉత్సవాలలో పాల్గొన్న మంత్రులకు వ్యతిరేకంగా నినాదాలు చేశారు. అంతకుముందు గన్ పార్కు వద్దకు ర్యాలీగా వెళ్లిన ర్యాలీ నిర్వహించిన విద్యార్తులను పోలీసులు అరెస్టు చేయడాన్ని వారు ఖండించారు. అయితే పరిస్థితి ఉద్రిక్తంగా మారుతుందని భావించిన పోలీసులు విద్యార్థులను అరెస్టు చేశారు. కాగా ర్యాలీ నిర్వహిస్తున్న విద్యార్థులను పోలీసులు మెయిన్ గేటు వద్ద అడ్డుకున్నారు. పోలీసులకు, విద్యార్థులకు మధ్య తోపులాట జరిగింది. విశ్వ విద్యాలయంలో నిరాహార దీక్ష చేస్తున్న విద్యార్థుల పరిస్థితి విషమంగా ఉంది.

తెలంగాణకు వ్యతిరేకంగా ఉత్సవాలలో పాల్గొన్న మంత్రులను మేం క్షమించమని, అలాగే పోలీసుల లాఠీచార్జిలకు, బుల్లెట్లకు భయపడమని విద్యార్థులు అన్నారు. ముఖ్యమంత్రి రోశయ్య ప్రజాస్వామ్యయుతంగా చేస్తున్న ఉద్యామాన్ని అణచాలని చూడటం దారుణమన్నారు. నిరసన ఉత్సవాలు నిర్వహిస్తామని మేం ముందే చెప్పామన్నారు. ప్రభుత్వం మమ్మల్ని అణగదొక్కాలని ప్రయత్నిస్తుందని కాని మేం వెనక్కి తగ్గేది లేదని విద్యార్థులు చెప్పారు.