వైయస్ పై సోనియాతో పాటు అందరికీ అపార గౌరవం ఉంది: డిఎస్

హైదరాబాద్: దివంగత నేత వైయస్ రాజశేఖర రెడ్డిపై తమ పార్టీ అధ్యక్షురాలు సోనియా గాంధీతో పాటు అందరికీ అపారమైన గౌరవం ఉందని ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ చెప్పారు. ఎఐసిసి సదస్సులో వైయస్సార్ మృతికి సంతాప తీర్మానం ప్రవేశపెట్టకపోవడంపై వచ్చిన విమర్సలపై ఆయన గురువారం మీడియా ప్రతినిధుల సమావేశంలో ప్రతిస్పందించారు. ఈ విషయంపై మీడియా ప్రతినిధులు ప్రశ్నించినప్పుడు దయచేసి, ఆ విషయాన్ని రాజకీయం చేయవద్దని కోరారు. ఎఐసిసి సదస్సులో ఏ విధమైన తీర్మానాలు చేయలేదని, సంతాప తీర్మానలతో పాటు ఇతర తీర్మానాలు డిసెంబర్ 18, 19, 20 తేదీల్లో జరిగే పార్టీ ప్లీనరీ సమావేశాల్లో మాత్రమే ఉంటాయని ఆయన స్పష్టం చేశారు. వైయస్సార్ మృతికి సంతాపం ప్రకటించడమే కాదు, వైయస్ సేవలను కూడా పార్టీ గుర్తిస్తుందని ఆయన చెప్పారు.

రాష్ట్రంలోని వరద బాధితులను ఆదుకోవాలని ఆయన ప్రధాని డాక్టర్ మన్మోహన్ సింగ్ ను, పార్టీ అధ్యక్షురాలు సోనియా గాంధీని కోరారు. సహాయక చర్యల్లో పాల్గొనాలని వరద తాకిడికి గురైన జిల్లాల్లోని పార్టీ అధ్యక్షులకు, పార్టీ శ్రేణులకు పిలుపునిచ్చారు. ఇటీవలి కాలంలో రాష్ట్రం తుఫాను తాకిడికి గురి కావడం ఇది రెండోసారి అని, వరద బాధితులను ఆదుకోవడానికి కేంద్ర ప్రభుత్వం ప్రత్యేకంగా ముందుకు రావాల్సిన అవసరం ఉందని ఆయన చెప్పారు.