సోనియాపై దుమ్మెత్తిపోసిన వైయస్ జగన్ వర్గం: అమీతుమీకే రెడీ

హైదరాబాద్: తమ పార్టీ అధ్యక్షురాలు సోనియా గాంధీని ఢీకొట్టేందుకే కాంగ్రెసు కడప పార్లమెంటు సభ్యుడు వైయస్ జగన్ వర్గం సమాత్తమైనట్లు కనిపిస్తోంది. సోనియాపై జగన్ వర్గానికి చెందిన అంబటి రాంబాబు, మేకపాటి రాజమోహన్ రెడ్డి తీవ్ర వ్యాఖ్యలు చేశారు. ఎఐసిసి సదస్సులో వైయస్సార్ రాజశేఖర రెడ్డి పేరు ఎత్తకపోవడంపై వారు మండిపడ్డారు. రాష్ట్రంలో రెండోసారి కాంగ్రెసుకు అధికారాన్ని కట్టబెట్టిన వైయస్సార్ ను కాంగ్రెసు విస్మరించిందని వారు తప్పు పట్టారు. నెల్లూరు ఓదార్పు యాత్రలో వైఎస్ జగన్ వెంట ఉన్న నెల్లూరు ఎంపీ మేకపాటి రాజమోహన్ రెడ్డి హైకమాండ్ వైఖరిపై దుమ్మెత్తి పోశారు. రాష్ట్రం నుంచి కాంగ్రెస్ పార్టీకి 32మంది ఎంపీలను అందించిన వైఎస్సార్ కుటుంబానికి అధిష్టానం ఇచ్చే గౌరవం ఇదేనా అని ప్రశ్నించారు. కనీసం ఆయన పేరును కూడా ప్రస్తావించడానికి వారికి సమయం లేదా అని ఆవేదన వ్యక్తం చేశారు. సోనియాకు కూడా అదే గతి పడుతుందని ఆయన వ్యాఖ్యానించారు.

మరోవైపు అంబటి రాంబాబు ఏఐసీసీపై విమర్శనా బాణాలు సంధించారు. వైఎస్సార్ పేరును ప్రస్తావించకుండా ఏఐసీసీ తప్పు చేసిందనీ, తద్వారా రాష్ట్ర ప్రజల్లో విశ్వాసాన్ని కోల్పోయిందన్నారు. ఏఐసీసీ సమావేశాల్లో వైఎస్సార్‌కు నివాళులర్పిస్తారని ప్రజలు ఎదురు చూశారనీ, ఆ కార్యక్రమం లేకపోవడంతో మండిపడుతున్నారన్నారు. వైఎస్సార్ కుటుంబాన్ని విస్మరిస్తే రాష్ట్రంలో కాంగ్రెస్ పార్టీకి 2003నాటి పరిస్థితులు పునరావృతం అవుతాయని వైయస్ జగన్ వర్గానికి చెందిన శాసనసభ్యుడు మేకపాటి చంద్రశేఖర రెడ్డి అన్నారు. అయితే ఏఐసీసీ సమావేశాల్లో సంతాప తీర్మానాలు ఉండవనీ, కేవలం సీడబ్ల్యూసీ ఎన్నిక మాత్రమే ప్రధాన ఎజెండాగా ఉంటుందని సీనియర్ కాంగ్రెస్ నేత తులసి రెడ్డి చెప్పారు. కాంగ్రెస్ పార్టీకి ఎనలేని సేవ చేసిన వైఎస్సార్‌ను పార్టీ ఎట్టి పరిస్థితిల్లోనూ విస్మరించదనీ, వచ్చే డిసెంబరు ప్లీనరీ సమావేశాల్లో వైఎస్సార్‌ సంతాప కార్యక్రమం ఉంటుందన్నారు.