గాలి జనార్దన్ రెడ్డి బ్రాహ్మణి స్టీల్స్ పని గోవిందా?

కడప: కర్ణాటక మంత్రి గాలి జనార్దన్ రెడ్డి కడప జిల్లాలో నిర్మించ తలపెట్టిన బ్రాహ్మణి స్టీల్స్ నిర్మాణం కార్యరూపం దాల్చే పరిస్థితి లేదనే వార్తలు వస్తున్నాయి. కడప జిల్లాలో ఈ ఫ్యాక్టరీని స్థాపించడం ద్వారా ఉపాధి అవకాశాలు పెరుగుతాయని ఆశించారు. కానీ, మొదటికే మోసం వచ్చే పరిస్థితి నెలకొందని ప్రచారం జరుగుతోంది. దివంగత నేత వైయస్ రాజశేఖర రెడ్డి హయాంలో ఈ ఫ్యాక్టరీ స్థాపనకు ప్రభుత్వం అనుమతి ఇచ్చింది. దానికోసం భూమిని కూడా కేటాయించింది. బ్రాహ్మణి స్టీల్స్ కు వాడుకునేందుకు ముడి ఇనుము పుష్కలంగా ఉన్న ఓబుళాపురం నిక్షేపాలను కూడా కట్టబెట్టింది. బ్రాహ్మణి స్టీల్స్ నిర్మాణం పూర్తి కాకపోవడంతో ఓబుళాపురం గనుల నుంచి తవ్విన ముడి ఇనుమును గాలి జనార్దన్ రెడ్డి ఎగుమతి చేసి పెద్ద యెత్తున సంపాదించుకున్నారని ఆరోపణలు వెల్లువెత్తాయి.

బ్రాహ్మణి స్టీల్స్ లో దివంగత నేత వైయస్ రాజశేఖర రెడ్డి కుమారుడు, కాంగ్రెసు కడప పార్లమెంటు సభ్యుడు వైయస్ జగన్ కు కూడా వాటాలున్నాయని అంటారు. అయితే, ఇటీవల గాలి జనార్దన్ రెడ్డికి అన్ని వైపుల నుంచి కష్టాలు ఎదురు కావడంతో బ్రాహ్మణి స్టీల్స్ నిర్మాణం ఆగిపోయేట్లుందని అంటున్నారు. బ్రాహ్మణి స్టీల్స్ లో 51 శాతం వాటాలను అమ్మకానికి పెట్టారని, అయితే దానికి సరైన ప్రతిస్పందన లభించలేదని అంటున్నారు. అలాగే, గాలి జనార్దన్ రెడ్డి అనుచరుల ఇళ్లపై ఐటి దాడులు కూడా ప్రభావం చూపినట్లు సమాచారం. గనుల తవ్వకాలపై కూడా ఆంక్షలు ప్రారంభమయ్యాయి. ఈ స్థితిలో బ్రాహ్మణి స్టీల్స్ నిర్మాణం డోలాయమానంలో పడిందనే ప్రచారం జరుగుతోంది.