కెసిఆర్ ప్రకటనను స్వాగతించిన మంత్రి బొత్స సత్యనారాయణ

హైదరాబాద్: కాంగ్రెసు పార్టీని బలోపేతం చేస్తామని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు ప్రకటనను రాష్ట్ర పంచాయతీ రాజ్ శాఖ మంత్రి బొత్స సత్యనారాయణ స్వాగతించారు. తాము ఇప్పటికీ బలంగానే ఉన్నామని, అయితే కాంగ్రెసు పార్టీ సిద్ధాంతాలు నచ్చి ఎవరైనా వస్తామంటే స్వాగతిస్తామని ఆయన శుక్రవారం మీడియా ప్రతినిధుల సమావేశంలో అన్నారు. తమ సిద్ధాంతాలు నచ్చి వస్తే తమకు అభ్యంతరం లేదని ఆయన అన్నారు. కెసిఆర్ ఎందుకున్నారో తనకు తెలియదు గానీ తమ పార్టీ బలోపేతానికి కెసిఆర్ వచ్చినా, ప్రజారాజ్యం పార్టీ అధ్యక్షుడు చిరంజీవి వచ్చినా తాము కాదనబోమని ఆయన అన్నారు.

తెలుగుదేశం కాలం చెల్లిన పార్టీ అని మున్సిపల్ శాఖ మంత్రి ఆనం రామనారాయణ రెడ్డి అన్నారు. తెలుగుదేశం పార్టీ తమకు రాష్ట్రంలోనే గాని కేంద్రంలో ప్రతిపక్షం కాదని ఆయన అన్నారు. వరద తాకిడి ప్రాంతాల్లో వరద సాయంపై ముఖ్యమంత్రి రోశయ్య సమీక్ష జరిపిన అనంతరం ఈ ఇద్దరు మంత్రులు మీడియా ప్రతినిధులతో మాట్లాడారు. తుఫాను తాకిడి ప్రాంతాల బాధితుల సాయం కోసం తాము కేంద్రానికి లేఖ రాస్తున్నట్లు వారు తెలిపారు.