ప్రభుత్వం విద్యార్థులపట్ల నిరంకుశంగా ప్రవర్తించింది: తెరాస

హైదరాబాద్: ప్రభుత్వం ఎస్ఐ రాత పరీక్షలను వాయిదా వేసుకోవడం తెలంగాణ విద్యార్థుల విజయంగా తెలంగాణ రాష్ట్ర సమితి నాయకుడు జగదీశ్వరరెడ్డి శుక్రవారం తెరాస భవనంలో ఏర్పాటు చేసిన విలేకరుల సమావేశంలో పేర్కొన్నారు. ఇలాంటి ఐక్యతే తెలంగాణలోని అందరి మధ్య ఉంటే తెలంగాణ రాష్ట్రం సాకారమవుతుందని ఆశాభావం వ్యక్తం చేశారు. శ్రీకృష్ణ కమిటి నివేదిక తెలంగాణకు అనుకూలంగానే వస్తుందని, అయితే అనుకోని విధంగా వ్యతిరేకంగా వస్తే జనవరిలో జరగబోయే ఉద్యమానికి అందరూ ఇలాగే కలిసి కట్టుగా ఉండాలని పిలుపునిచ్చారు.

ప్రభుత్వం, పోలీసులు నిరంకుశంగా ప్రవర్తించి విద్యార్థుల ఉద్యమాన్ని అణిచివేయాలనుకుందన్నారు. అయితే విద్యార్థులు డిమాండుకు ప్రభుత్వం దిగిరాక తప్పలేదన్నారు. పోలీసులు విద్యార్థుల పట్ల కర్కశంగా వ్యవహరించారన్నారు. లాఠీచార్జీలు, రబ్బర్ బుల్లెట్లు ప్రయోగించటం సిగ్గుచేటన్నారు. పలువురు విద్యార్థులు తీవ్రంగా గాయపడ్డారని వారందరికీ ప్రభుత్వం వైద్య సేవలు ఉచితంగా అందించాలన్నారు. అలాగే విద్యార్థులపై పెట్టిన కేసులు ఎత్తివేయాలని, వారిని భేషరతుగా విడుదల చేయాలని డిమాండ్ చేశారు.

ఇల్లలకగానే పండుగ కాదని, అలాగే పరీక్షలు వాయిదా వేయడంతో ప్రభుత్వం పని అయిపోలేదని వెంటనే 14ఎఫ్ ను సవరించాలని మరో నాయకుడు శ్రవణ్ అన్నారు. ముఖ్యమంత్రి రోశయ్య అఖిలపక్షాన్ని వెంటనే ఢిల్లీకి తీసుకెళ్లాలన్నారు. హైదరాబాదు ఫ్రీజోన్ కాదని ప్రభుత్వం ప్రకటన చేయాలన్నారు. బందు చేయాలని మా ఉద్దేశ్యం కాదని, అయితే ప్రభుత్వం తీరుకు నిరసనగా మాత్రమే బందుకు పిలుపునిచ్చామని, దానిని ఉపసంహరించుకుంటున్నట్టు వారు తెలిపారు.

కాగా తమ నాయకులు రాజారాంయాదవ్, పిడమర్తి రవిలను వెంటనే విడుదల చేయాలంటూ ఉస్మానియా విశ్వవిద్యాలయం విద్యార్థులు ప్రభుత్వాన్ని డిమాండు చేశారు. ఎస్ఐ రాత పరీక్షలు రద్దు చేయటంపట్ల హర్షం వ్యక్తం చేస్తూ విద్యార్థులు భారీ ర్యాలీ నిర్వహించారు. అనంతరం వారు ఉస్మానియా పోలీసు స్టేషన్ ముందు తమ విద్యార్థులను విడుదల చేయాలంటూ ఆందోళన విర్వహించారు.