నథింగ్ స్పెషల్, సోనియా గాంధీతో భేటీ లేదు: చిరంజీవి

హైదరాబాద్: తన ఢిల్లీ పర్యటనలో ప్రత్యేక ఏమీ లేదని ప్రజారాజ్యం పార్టీ అధినేత చిరంజీవి అన్నారు. ఢిల్లీకి బయలుదేరే ముందు ఆయన మంగళవారం ఉదయం ఓ తెలుగు ప్రైవేట్ చానెల్ తో మాట్లాడారు. పోలవరం ప్రాజెక్టుపై ప్రధాని మన్మోహన్ సింగ్ ను కలిసేందుకు మాత్రమే తాను ఢిల్లీ వెళ్తున్నానని ఆయన చెప్పారు. కాంగ్రెసు అధ్యక్షురాలు సోనియా గాంధీతో అపాయింట్ మెంటు లేదని ఆయన స్పష్టం చేశారు. తాను సోనియా గాంధీతో మాట్లాడడం లేదని ఆయన చెప్పారు. ఏమైనా ఉంటే ఢిల్లీలో మాట్లాడుతానని ఆయన అన్నారు.

కాంగ్రెసు అధిష్టానం రాష్ట్రంలో నాయకత్వ మార్పునకు, కడప పార్లమెంటు సభ్యుడు వైయస్ జగన్ పై చర్యలకు పూనుకుంటోందని వార్తలు వస్తున్న నేపథ్యంలో చిరంజీవి ఢిల్లీ పర్యటనకు ప్రాధాన్యం చేకూరిందని రాజకీయ వర్గాలంటున్నాయి. రాష్ట్ర ప్రభుత్వంలో ప్రజారాజ్యం పార్టీని చేర్చుకునేందుకు చిరంజీవితో కాంగ్రెసు అధిష్టానం మాట్లాడుతుందని అంటున్నారు. ముఖ్యమంత్రి రోశయ్య, పిసిసి అధ్యక్షుడు డి. శ్రీనివాస్, గవర్నర్ నరసింహన్ ఢిల్లీలో ఉంటున్న నేపథ్యంలో చిరంజీవి ఢిల్లీ వెళ్తున్నారు. దీంతో చిరంజీవిని కూడా మార్పులు చేర్పుల్లో భాగస్వామిని చేసేందుకు కాంగ్రెసు అధిష్టానం ఢిల్లీకి ఆహ్వానించినట్లు చెబుతున్నారు.