ముఖ్యమంత్రిగా రాజీనామా చేస్తానని ప్రకటించిన రోశయ్య

హైదరాబాద్: ముఖ్యమంత్రిగా తాను రాజీనామా చేస్తున్నట్లు కె. రోశయ్య ప్రకటించారు. ఆయన బుధవారం సరిగ్గా మధ్యాహ్నం ఒంటి గంటన్నరకు ఈ ప్రకటన చేశారు. సోమవారం సాయంత్రం నుంచి చెలరేగుతున్న ఊహాగానాలకు దీంతో తెర పడింది. క్రమశిక్షణ గల సైనికుడిగా తాను పార్టీ అధిష్టానం అప్పగించిన పనులు చేశానని ఆయన చెప్పారు. మీడియా సమావేశం ఏర్పాటు చేసి ఆయన తన రాజీనామా విషయాన్ని వెల్లడించారు. మీడియా సమావేశం తర్వాత నేరుగా ఆయన రాజభవన్ కు వెళ్లి తన రాజీనామా లేఖను గవర్నర్ నరసింహన్ కు అందజేసే అవకాశం ఉంది.

బుధవారం సాయంత్రం జరిగే సిఎల్పీ సమావేశంలో ఆయన శాసనసభ్యులకు, ఎమ్మెల్సీలకు ధన్యవాదాలు తెలిపే అవకాశాలున్నాయి. కొత్త నేత ఎంపిక కూడా జరిగే అవకాశాలున్నట్లు చెబుతున్నారు. ముఖ్యమంత్రి పదవి కోసం మర్రి శశిధర్ రెడ్డి, జైపాల్ రెడ్డి, గీతారెడ్డి, కిరణ్ కుమార్ రెడ్డి రేసులో ఉన్నట్లు వార్తలు వస్తున్నాయి.