ముఖ్యమంత్రి ఇష్టానుసారమే మంత్రివర్గం: వీరప్ప మొయిలీ

హైదరాబాద్: ముఖ్యమంత్రి ఇష్టానుసారంగానే మంత్రి వర్గం ఉంటుందని కాంగ్రెసు ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ అన్నారు. తెలంగాణకు ఉప ముఖ్యమంత్రి పదవి ఉంటుందని ఆయన చెప్పారు. ఉప ముఖ్యమంత్రి పదవిని ఆశిస్తున్న పొన్నాల లక్ష్మయ్య, జె. గీతారెడ్డిలతో పాటు మరి కొంత మంది గురువారం ఉదయం మొయిలీని కలిశారు. ఈ సందర్భంగా మొయిలీ మీడియా ప్రతినిధులతో మాట్లాడారు. మంత్రివర్గాన్ని ఎప్పుడు, ఎలా ఏర్పాటు చేసుకోవాలనేది ముఖ్యమంత్రి ఇష్టంపైనే ఆధారపడి ఉంటుందని ఆయన చెప్పారు.

ముఖ్యమంత్రిగా కిరణ్ కుమార్ రెడ్డిని సోనియా గాంధీని ఎంపిక చేశారని ప్రకటించిన తర్వాత బుధవారం రాత్రి ప్రణబ్ ముఖర్జీ, ఎకె ఆంటోనీ ఢిల్లీకి తిరిగి వెళ్లిపోయారు. గులాం నబీ ఆజాద్, వీరప్ప మొయిలీ హైదరాబాదులోని ఉండిపోయారు. కిరణ్ కుమార్ రెడ్డి ప్రమాణ స్వీకారోత్సవానికి హాజరు కావడానికి వారు రాజభవన్ చేరుకున్నారు. ప్రమాణ స్వీకారోత్సవం సందర్భంగా రాజభవన్ సందడి నెలకొంది.