కొత్త ముఖ్యమంత్రి కిరణ్ కుమార్ రెడ్డి: రాత్రే ప్రకటించిన ప్రణబ్

హైదరాబాద్: రాష్ట్ర నూతన ముఖ్యమంత్రిగా ప్రస్తుత శాసనసభ స్పీకర్‌, చిత్తూరు జిల్లా పీలేరు శానససభ్యుడు నల్లారి కిరణ్‌కుమార్‌రెడ్డి గురువారం బాధ్యతలు స్వీకరించనున్నారు. బుధవారం రాత్రి ఆయన సీఎల్పీ నేతగా ఎంపికయ్యారు. కేవలం ఏడాదిన్నరలోపే రాష్ట్రానికి మూడో ముఖ్యమంత్రిగా కిరణ్‌ వస్తున్నారు. అధిష్ఠానం తొలినుంచి కిరణ్‌వైపే మొగ్గుచూపినా మధ్యలో తెలంగాణ కార్డుతో కేంద్ర మంత్రి జైపాల్‌రెడ్డి పేరు కూడా ప్రచారంలోకి వచ్చింది. అధిష్ఠానం మాత్రం ముందుగా తీసుకున్న నిర్ణయానికే కట్టుబడింది. స్పీకర్‌గా, గతంలో ప్రభుత్వ చీఫ్‌విప్‌గా కిరణ్‌కుమార్‌ అందించిన సేవలను అధిష్ఠానం పరిగణనలోకి తీసుకుంది. కిరణ్‌ తండ్రి దివంగత అమరనాథ్‌రెడ్డి గతంలో మంత్రిగా పనిచేశారు. ఆయన ఇందిరాగాంధీకి అత్యంత సన్నిహితునిగా ముద్రపడ్డారు. ఆ విధంగా నల్లారి కుటుంబం ఇందిర కుటుంబానికి విధేయులన్న పేరుంది. అది కిరణ్‌కు బాగా కలిసొచ్చింది. విధ్యాధికుడైన కిరణ్‌ మితభాషిగా పేరుపడ్డారు. ఆయన వయస్సు 50 సంవత్సరాలు. రాజకీయాల్లో యువతకు అవకాశాలివ్వాలనే సోనియా, రాహుల్‌ల అభిప్రాయం మేరకు ఈ ఎంపిక జరిగిందని భావిస్తున్నారు.

సిఎల్పీ నేత ఎంపిక బాధ్యతను సోనియా గాంధీకి అప్పగిస్తూ తీర్మానం చేసిన అనంతరం వారంతా లేక్‌వ్యూ అతిథి గృహానికి వెళ్ళి పార్టీ అధ్యక్షురాలు సోనియాగాంధీతో ఫోన్‌లో మాట్లాడారు. నిర్ణయాధికారం అమెకు అప్పగించిన విషయం చెప్పగా ఆమె కిరణ్‌కుమార్‌రెడ్డిని నియమిస్తున్నట్లు తెలిపారు. ఆ విషయాన్ని ప్రణబ్‌ వెంటనే విలేకరులకు వివరించారు. ఇది జరగడానికి కొద్దిసేపటికి ముందే ఇంటివద్ద ఉన్న కిరణ్‌ను వారు తమ వద్దకు పిలిపించుకున్నారు. ముందుగా ఆయనకు చెప్పాకే ప్రణబ్‌ ప్రకటన చేశారు.

అంతకు ముందు తెలంగాణకు చెందిన నేతను సీఎంను చేయాలంటూ కొందరు ఆ ప్రాంత ఎమ్మెల్యేలు, ఎమ్మెల్సీలు కోరారు. ఈ మేరకు సంతకాల సేకరణ జరిగింది. ఇదే సమయంలో జగన్‌ వర్గం ఎమ్మెల్యేలు కొందరు వై.వి.సుబ్బారెడ్డి ఇంట్లో సమావేశమై సీఎల్‌పీ సమావేశంలో జగన్‌పై చర్యల విషయం ప్రస్తావనకు వస్తే ధీటుగా స్పందించాలనే నిర్ణయం తీసుకున్నారు. సీఎల్పీ నేత విషయంలో జగన్‌ పేరును ప్రస్తావిస్తామని కూడా వారు తెలిపారు. సమావేశం కేవలం సీఎల్పీ నేత ఎన్నికకే పరిమితమయింది. జగన్‌ వర్గ ఎమ్మెల్యేలు మాట్లాడే యత్నం చేయబోగా ఇతర ఎమ్మెల్యేలు వారించారు.