నేడు 12.14కు ముఖ్యమంత్రిగా కిరణ్ కుమార్ రెడ్డి ప్రమాణం

హైదరాబాద్: ఆంధ్రప్రదేశ్‌ 16వ ముఖ్యమంత్రిగా నల్లారి కిరణ్‌కుమార్‌రెడ్డి గురువారం మధ్యాహ్నం 12.14 గంటలకు రాజ్‌భవన్‌లో ప్రమాణం చేయనున్నారు. గవర్నర్‌ నరసింహన్‌ ఆయన చేత ప్రమాణం చేయిస్తారు. ఈ కార్యక్రమాన్ని నిరాడంబరంగా నిర్వహించనున్నారు. సమయం తక్కువగా ఉండడం వల్ల మీడియాను కూడా దీనికి దూరంగా ఉంచుతున్నారు. నేడు కిరణ్ కుమార్ రెడ్డి ఒక్కరే ప్రమాణ స్వీకారం చేస్తారు. మంత్రివర్గ కూర్పుపై కసరత్తు చేయాల్సి ఉంది. ప్రమాణ స్వీకారం చేసిన తర్వాత మంత్రివర్గ కూర్పుపై చర్చించేందుకు కిరణ్ కుమార్ రెడ్డి ఢిల్లీకి బయలుదేరి వెళ్తారని భావిస్తారు.

సీఎల్పీనేత ఎంపిక కోసం ఢిల్లీ నుంచి వచ్చిన ప్రణబ్‌ముఖర్జీ, ఆంటోనీలు బుధవారం రాత్రి పదిన్నర ప్రాంతంలో ఢిల్లీ వెళ్ళిపోయారు. కిరణ్‌కుమార్‌రెడ్డి, శాసనమండలి ఛైర్మన్‌ చక్రపాణి, మంత్రులు ధర్మాన ప్రసాదరావు, దానం నాగేందర్‌ తదితరులు వారికి వీడ్కోలు పలికారు. అనంతరం కిరణ్‌కుమార్‌రెడ్డి నేరుగా మళ్ళీ లేక్‌వ్యూ అతిధి గృహానికి వచ్చి గులాంనబీ అజాద్‌, వీరప్ప మొయిలీలతో భేటీ అయ్యారు.