కెసిఆర్, చిరంజీవి సోనియాగాంధీ రిమోట్ కంట్రోళ్లు: తెదేపా

వరంగల్: ప్రజారాజ్యం అధ్యక్షుడు చిరంజీవి, తెలంగాణ రాష్ట్ర సమితి అధ్యక్షుడు కె చంద్రశేఖరరావు ఏఐసిసి అధ్యక్షురాలు సోనియాగాంధీ చేతిలో రిమోట్ కంట్రోల్స్ వలె వ్యవహరిస్తున్నారని తెలుగుదేశం పార్టీ రాష్ట్ర ప్రధాన కార్యదర్శి అరవింద్ కుమార్ గౌడ్ వరంగల్ జిల్లాలో విలేకరుల సమావేశంలో ధ్వజమోత్తారు. వరంగల్ లో డిసెంబర్ 9న తెరాస నిర్వహించనున్న మహాగర్జన బహిరంగ సభకు ఆంధ్రా పారిశ్రామికవేత్తలకు చెందిన ఫ్యాక్టరీ నుండి ఆ పార్టీ అధినేత కెసిఆర్ పెద్ద ఎత్తున డబ్బు వసూళ్లకు పాల్పడుతున్నారన్నారు.

కెసిఆర్ కూలీపని పైరుతో తెలంగాణ జిల్లాల్లో లక్షల కొద్ది డబ్బులు తీసుకుంటున్నారని, వారితో ముందస్తు ఒప్పందాలు చేసుకొని వసూళ్ల దందాలు చేస్తున్నారన్నారు. తెలంగాణ సాధన కోసం ఉధ్యమిస్తామన్న కెసిఆర్ ఇప్పుడు డబ్బుల దందా కోసం ఉద్యమిస్తున్నారని విమర్శించారు. తెలుగుదేశాన్ని ప్రధాన శత్రువుగా చూస్తున్న తెరాస, ప్రజారాజ్యం అధినేతలు కేసీఆర్, చిరంజీవిలకు ప్రజా సమస్యలపై చిత్తశుద్ది లేదన్నారు.