ఆనం రాయబారం: వెనక్కి తగ్గని బొత్స, ధర్మాన ప్రసాదరావు

హైదరాబాద్‌: అసంతృప్తి చెందిన మంత్రులను బుజ్జగించడానికి ముఖ్యమంత్రి కిరణ్ కుమార్ రెడ్డి తరఫున మంత్రి ఆనం రామనారాయణ రెడ్డి రాయబారిగా వ్యవహరిస్తున్నారు. గత రాత్రి అసంతృప్తికి గురైన బొత్స సత్యనారాయణ, ధర్మాన ప్రసాదరావు, వట్టి వసంతకుమార్ లతో ఆనం రామనారాయణ రెడ్డి జరిపిన చర్చలు ఫలించలేదు. మరోసారి గురువారం ఉదయం ఆనం రామనారాయణ రెడ్డి, రఘువీరా రెడ్డి, పితాని సత్యనారాయణ రంగంలోకి దిగారు. బొత్స సత్యనారాయణను, ధర్మాన ప్రసాదరావును బుజ్జగించడానికి వారు ప్రయత్నించారు. వారితో చర్చలు జరిపిన తర్వాత ఆనం రామనారాయణ రెడ్డి, రఘువీరా రెడ్డి, పితాని సత్యనారాయణ ముఖ్యమంత్రి నివాసానికి చేరుకున్నారు.

కాగా, ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ కూడా తెర మీదికి వచ్చారు. మంత్రుల్లో అసంతృప్తి ఉన్నమాట వాస్తవమేనని అంగీకరించిన డిఎస్ గొడవ సమసిపోతుందని ఆశాభావం వ్యక్తం చేశారు. డి. శ్రీనివాస్ బొత్స సత్యనారాయణ మాట్లాడారు. అసంతృప్తి చెందిన మంత్రులు ధర్మాన ప్రసాదరావు నివాసంలో సమావేశమయ్యారు. మంత్రి అహ్మదుల్లా పది మంది శానససభ్యులతో సమావేశమవుతున్నారు. మంత్రుల్లో అసంతృప్తి లేదని, అంతా మీడియా సృష్టేనని కాంగ్రెసు ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ అన్నారు. వీరప్ప మొయిలీతో పాటు మరో అధిష్టానం దూత హైదరాబాదు వచ్చే అవకాశాలున్నాయని అంటున్నారు.