కులాల మధ్య చిచ్చు పెడుతోంది: ప్రభుత్వంపై మోత్కుపల్లి నర్సింహులు

హైదరాబాద్: ఎస్సీ రిజర్వేషన్ల వర్గీకరణకు అనుకూలంగా రాజ్యాంగ సవరణ చేయించుకుండా ముఖ్యమంత్రి కిరణ్ కుమార్ రెడ్డి ప్రభుత్వం కులాల మధ్య చిచ్చు పెడుతోందని తెలుగుదేశం శాసనసభ్యుడు మోత్కుపల్లి నర్సింహులు ఆరోపించారు. వర్గీకరణ కోసం అఖిల పక్ష ప్రతినిధులను ఢిల్లీకి తీసుకుని వెళ్లాలని మందకృష్ణ మాదిగ చేస్తున్న నిరాహార దీక్షకు మద్దతుగా తెలుగుదేశం నాయకులు చేపట్టిన చలో సిఎం నివాసం కార్యక్రమాన్ని పోలీసులు సోమవారం భగ్నం చేసిన తర్వాత ఆయన మీడియా ప్రతినిధులతో మాట్లాడారు. వర్గీకరణ ఒక కులానికి సంబంధించిన అంశం కాదని, 59 కులాలకు చెందిన అంశమని, ఎస్సీ రిజర్వేషన్ల వల్ల ఏ మాత్రం లబ్ధి పొందని కులాలు ఇందులో ఉన్నాయని, వర్గీకరణ వల్ల ఆ కులాలు లబ్ది పొందుతాయని ఆయన వివరించారు.

మాదిగ కులానికి చెందినవారిపై పోలీసులు లాఠీచార్జీ చేయడాన్ని ఆయన తీవ్రంగా వ్యతిరేకించారు. పోలీసుల చేత లాఠీచార్జీ చేయించి ప్రభుత్వం చరిత్రహీనంగా మిగిలిపోతోందని ఆయన వ్యాఖ్యానించారు. ఎస్సీ రిజర్వేషన్ల వర్గీకరణ కోసం మందకృష్ణ మాదిగ 15 ఏళ్లుగా ఉద్యమం చేస్తున్నారని, శానససభలో ఎస్సీ రిజర్వేషన్లకు అనుకూలంగా తీర్మానం జరిగిందని, రాజ్యాంగ సవరణ ద్వారా దాన్ని అమలులోకి తెప్పించడంలో రాష్ట్ర ప్రభుత్వం విఫలమైందని ఆయన విమర్శించారు. ఎస్సీ రిజర్వేషన్ల వర్గీకరణపై తాము శాసనసభలో పోరాడుతామని తెలుగుదేశం శాసనసభ్యుడు నాగం జనార్దన్ రెడ్డి అన్నారు.