కాంగ్రెసులో నాకు తీవ్ర అన్యాయం జరిగింది: కుతూహలమ్మ

న్యూఢిల్లీ: కాంగ్రెసు పార్టీలో తనకు తీరని అన్యాయం జరిగిందని గంగాధర నెల్లూరు నియోజగవర్గం శాసనసభ్యురాలు కుతూహలమ్మ బుధవారం అన్నారు. కిరణ్ కుమార్ రెడ్డి మంత్రివర్గంలో తనకు చోటు కల్పించక పోవడం, తనకు జరిగిన అన్యాయం, పార్టీకి చేసిన సేవలు అన్ని ఏఐసిసి అధ్యక్షురాలు సోనియాగాంధీకి వివరించానని కుతూహలమ్మ అన్నారు. మహిళను నిర్లక్ష్యం చేసిన ఏ పార్టీ కూడా మనుగడ సాధించలేదని ఆమె అన్నారు. ప్రస్తుతం కాంగ్రెసు లో నాకు అన్యాయం జరుగుతుందన్నారు.

అంతకుముందు కిరణ్ కుమార్ రెడ్డి మంత్రివర్గంలో చోటు దక్కనందున ఆమె తీవ్ర ఆవేదన వ్యక్తం చేశారు. నెల్లురూ జిల్లానుండి ఒక్క ఎస్సీ మంత్రి కూడా లేరని తనకు మంత్రివర్గంలో చోటిస్తే బాగుండేదన్నారు. తనకు డబ్బు లేదని, ఎస్సీ సామాజిక వర్గానికి చెందిన వ్యక్తిని అయినందునే మంత్రివర్గంలోకి తీసుకోలేదని ఆరోపించారు. ఢిల్లీ వెళ్లి సోనియాగాంధీని కలిసి తనకు మంత్రివర్గంలో చోటివ్వాల్సిందిగా కోరుతానని ప్రకటించారు.