రఘువీరారెడ్డి కండకావరంతో మాట్లాడుతున్నారు: నాగం జనార్ధన్ రెడ్డి

హైదరాబాద్: ఒక కాలు అక్కడ మరో కాలు ఇక్కడ పెట్టే మంత్రులతో ముఖ్యమంత్రి కిరణ్ కుమార్ రెడ్డి పరిపాలన ఏం సాగిస్తాడోనని పరోక్షంగా వైఎస్ జగన్ ను ఉద్దేశిస్తూ తెలుగుదేశం పార్టీ సీనియర్ శాసనసభ్యుడు నాగం జనార్ధన్ రెడ్డి గురువారం అసెంబ్లీ ప్రాంగణంలో అన్నారు. రెండు పడవలపైన కాలు పెట్టే మంత్రులతో కిరణ్ పరిపాలన సాగిస్తే ప్రభుత్వం ఎప్పుడో బంగాళాఖాతంలో పడిపోతుందన్నారు. గత కొద్ది నెలల నుండి రాష్ట్రంలో కురుస్తున్న వర్షాల రైతులను తీవ్ర నష్టాలలోకి నెట్టాయన్నారు.

ప్రభుత్వం రైతులనుండి క్వింటాలు ధాన్యం కూడా కొనలేదు. కాని రైతులను ఆదుకుంటామని చెబుతుందన్నారు. రైతుల సమస్యలను పట్టించుకోని రఘువీరారెడ్డి కండకావరంతో మాట్లాడుతున్నారని ధ్వజమెత్తారు. రైతుల సమస్యలపై ప్రభుత్వం నిర్లక్ష్యం వహిస్తుందన్నారు. పత్తి, వరి, చెరుకు నష్టపోయిన రైతులకు 10వేల నష్ట పరిహారాన్ని కూడా ప్రభుత్వం చెల్లించటం లేదు.

కానీ ఒక్కడే మంత్రి లక్షా డెబ్బయివేల కోట్ల అవినీతికి పాల్పడితే తప్పులేదన్నారు. అవినీతిలో కూరుకుపోయిన ప్రభుత్వానికి రైతులు, ప్రజల సమస్యలపై చిత్తశుద్ది లేదన్నారు. రైతులను ఆదుకోవడానికే తెదేపా అధినేత చంద్రబాబునాయుడు నిరవదిక నిరాహార దీక్షకు పూనుకున్నాడన్నారు. బాబు దీక్ష రైతులకు ఖచ్చితంగా మేలు చేస్తుందన్నారు. ఇకనుండి తమ పార్టీ రైతులను ఆదుకోవాలని నినాదంతో ముందుకు వెళుతుందన్నారు.