ఒయు విద్యార్థులను విడుదల చేయాలంటూ బస్సులకు నిప్పు

హైదరాబాద్: హైదరాబాదులోని చర్లపల్లి జైలులో ఉన్న ఉస్మానియా విశ్వవిద్యాలయం విద్యార్థులను బేషరతుగా విడుదల చేయాలని డిమాండ్ చేస్తూ గుర్తు తెలియని వ్యక్తులు శుక్రవారం రాత్రి కలకలం సృష్టించారు. కరీంనగర్ జిల్లాలోని ఇరుకల్లు వంతెనపై ఆర్టీసి బస్సుకు దుండగులు నిప్పు పెట్టారు. డ్రైవర్ కు ఓ లేఖ ఇచ్చి వెళ్లారు. ఒయు విద్యార్థులను వెంటనే విడుదల చేయాలని ఆ లేఖలో డిమాండ్ చేశారు.

కాగా, రంగారెడ్డి జిల్లాలోని మేడిపల్లిలో ఇద్దరు గుర్తు తెలియని వ్యక్తులు మేడిపల్లిలో గోపరాజు రంగరాజు ఇంజనీరింగ్ కళాశాల బస్సుకు నిప్పు పెట్టారు. దుండగులు నిప్పు పెడుతుండడాన్ని గమనించిన డ్రైవర్, క్లీనర్ బస్సు దిగి పారిపోయారు. బస్సు వద్ద దుండగులు ఓ లేఖను వదిలి వెళ్లారు. జైలులో ఉన్న ఒయు విద్యార్థులు సుమన్, రాజారాం యాదవ్ తదితరులను విడుదల చేయాలని ఆ లేఖలో డిమాండ్ చేశారు.