కామన్ వెల్త్ స్కామ్: సురేష్ కల్మాడీ ఇళ్లపై సిబిఐ దాడులు

న్యూఢిల్లీ‌: కామన్ వెల్త్ క్రీడల నిర్వహణలో నిధుల అక్రమాల ఆరోపణలకు చెందిన వ్యవహారంలో కేంద్ర దర్యాప్తు సంస్థ (సిబిఐ) శుక్రవారం ఉదయం కాంగ్రెసు పార్లమెంటు సభ్యుడు సురేష్ కల్మాడీ ఇళ్లపై దాడులు నిర్వహించింది. ఢిల్లీ, పూణేల్లోని ఆయన నివాసాలపై ఈ దాడులు జరుగుతున్నాయి. సిడబ్ల్యుజి ఆర్గనైజింగ్ కమిటీ చైర్మన్ గా ఉన్నప్పుడు సురేష్ కల్మాడీ నిధుల వినియోగంలో అక్రమాలకు పాల్పడినట్లు వార్తలు వచ్చాయి. రెండు నగరాల్లోని నాలుగు చోట్ల సిబిఐ సోదాలు నిర్వహిస్తోంది.

దర్యాప్తులో కల్మాడీ, ఆయన అనుచరులు జోక్యం చేసుకుంటున్నారని సిబిఐ ఇంతకు ముందు ఫిర్యాదు చేసింది. కల్మాడీ అనుచరులు టిఎస్ దర్బారీ, సంజయ్ మహింద్రూ ఇప్పటికే కటకటాలు లెక్కిస్తున్నారు. కల్మాడీపై సిబిఐ తాజాగా శుక్రవారం సాయంత్రం ఎఫ్ఐఆర్ దాఖలు చేసే అవకాశం ఉంది. దీంతో సురేష్ కల్మాడీ ఖేల్ ఖతం అయినట్లేనని భావిస్తున్నారు.