వేరే దారి లేకనే దీక్షలకు దిగాం: సోనియాకు కాంగ్రెసు ఎంపీల లేఖ

హైదరాబాద్: విధిలేకనే తాము నిరాహార దీక్ష చేపట్టామని కాంగ్రెసు తెలంగాణ పార్లమెంటు సభ్యులు చెప్పారు. నిరాహార దీక్ష చేస్తున్న నేపథ్యంలో వారు సోమవారం రాత్రి ఏఐసీసీ అధ్యక్షురాలు సోనియాగాంధీకి లేఖ రాశారు. తొలిసారిగా వివిధ ప్రజా సంఘాలు కాంగ్రెస్‌తో కలసి పనిచేస్తున్నాయని, కొత్త సమీకరణాలకు ఇది దారి తీస్తుందని అందులో వివరించారు. విద్యార్థులపై పెట్టిన కేసులను ఎత్తివేయాలని కోరినా కేంద్ర, రాష్ట్ర ప్రభుత్వాలు స్పందించలేదని పేర్కొన్నారు. విధిలేని పరిస్థితులోనే నిరాహార దీక్ష చేస్తున్నామని తెలిపారు. తెరాస వరంగల్‌లో భారీ కార్యక్రమాన్ని చేపట్టిందని లేఖలో ప్రస్తావించారు.

తాము దీక్ష చేపట్టిన కొన్ని గంటల్లోనే గద్దర్‌, విమలక్క లాంటి ముఖ్యులు వచ్చి సంఘీభావం తెలిపారని వివరించారు. 'మీ నాయకత్వంలోని కాంగ్రెస్‌ మాత్రమే తెలంగాణ ఇస్తుందనే విశ్వాసాన్ని పలువురు వ్యక్తం చేశారు' అని పేర్కొన్నారు. వేలమంది కాంగ్రెస్‌ నాయకులు, కార్యకర్తలు దీక్ష శిబిరాన్ని సందర్శించారని తెలిపారు. దీక్ష చేస్తున్న కాంగ్రెస్‌ ఎంపీలను సోమవారం రాత్రి ఉస్మానియా జనరల్‌ ఆస్పత్రి సూపరింటెండెంట్‌ సంపత్‌కుమార్‌ ఆధ్వర్యంలోని వైద్య బృందం వైద్య పరీక్షలు చేసింది. ఎంపీ మంద జగన్నాథంకు బీపీ ఎక్కువైందని, దీక్ష చేస్తున్న మిగతావారి ఆరోగ్యం నిలకడగానే ఉందని వైద్యులు తెలిపారు.