తెలంగాణ వ్యతిరేకతపై పట్టు సడలించిన జెసి దివాకర్ రెడ్డి

హైదరాబాద్: కేంద్ర ప్రభుత్వం తెలంగాణ అంశంపై ఏర్పాటు చేసిన శ్రీకృష్ణ కమిటీ నివేదికపై అధిష్టానం ఎలాంటి నిర్ణయం తీసుకున్నాదానికి కట్టుబడి ఉంటామని మాజీ మంత్రి జెసి దివాకర్ రెడ్డి శుక్రవారం పిసిసి కార్యాలయంలో ఏర్పాటు చేసిన విలేకరుల సమావేశంలో చెప్పారు. నివేదిక తమకు అనుకూలంగా రాకుంటే రాజీనామా చేస్తామని ఇరుప్రాంతాల వ్యక్తులు చేసిన వ్యాఖ్యానాల పట్ల ఆయన స్పందించారు. రాజీనామాలు చేసే వారని చేయనివ్వండి అని అన్నారు. శ్రీకృష్ణ కమిటీ నివేదిక వల్ల ఏమీ జరగదున్నారు. కేంద్రం తగు నిర్ణయం తీసుకుంటుందని ఆయన అశాభావం వ్యక్తం చేశారు.

కృష్ణా ట్రిబ్యునల్ తీర్పు ద్వారా రాయలసీమకు తీవ్ర అన్యాయం జరిగిందని ఆయన అన్నారు. దీనిపై ఏం చేయాలో ప్రభుత్వం పరిశీలిస్తుందన్నారు. మైత్రివనం దగ్గరి స్థలం విషయంలో మాజీ ముఖ్యమంత్రి కొణిజేటి రోశయ్యపై ఆరోపణలు రావడం బాధాకరమన్నారు. రోశయ్యకు ఆ స్థలానికి ఎలాంటి సంబంధం లేదన్నారు. అందులో ఆయన తప్పు ఏమాత్రం లేదన్నారు. రోశయ్యపై బురద జల్లడానికే భూసేకరణకు ఆయనకు సంబంధాలు పెట్టి కొందరు మాట్లాడుతున్నారన్నారు.