జగన్ చిట్టా విప్పుతా, ఆయన వర్గాన్నీ వదలను: మంత్రి డిఎల్ రవీంద్రారెడ్డి

కడప: మాజీ పార్లమెంటు సభ్యుడు వైయస్ జగన్మోహన్‌రెడ్డి అవినీతి చిట్టా త్వరలో విప్పుతానని ఆరోగ్యశాఖ మంత్రి డిఎల్ రవీంద్రారెడ్డి సోమవారం అన్నారు. కేవలం జగన్‌ను మాత్రమే కాదని ఆయన వర్గం నేతలనూ వదిలనని ఆయన హెచ్చరించారు. జగన్ భారీ అక్రమాలకు పాల్పడ్డాడని ఆయన ఆరోపించారు. త్వరలో జరిగే పులివెందుల శాసనసభ్యత్వానికి, కడప పార్లమెంటు సభ్యత్వానికి జరిగే ఉప ఎన్నికలలో ఆయన చిట్టా విప్పుతానన్నారు.

జగన్ దౌర్జన్యంగా అధికారంలోకి రావాలని ప్రయత్నాలు చేస్తున్నారని ఆరోపించారు. దౌర్జన్యంగా ప్రవర్తించేవారిని ప్రజలు ఆమోదించరన్నారు. తన నియోజకవర్గానికి ఎవరిని ఇంఛార్జ్‌గా నియమించినా గెలుపును నిర్ణయించేది ప్రజలేనన్నారు. ఇటీవలే ప్రజారాజ్యం పార్టీనుండి జగన్ వర్గంలోకి చేరిన భూమా నాగిరెడ్డిని జగన్ మంత్రి డిఎల్ రవీంద్రారెడ్డి నియోజకవర్గం అయిన మైదుకూరుకు ఇంఛార్జ్‌గా నియమించారు. దీనిపై ఆయన పైవిధంగా స్పందించారు.